Vielha, 26 de junh de 2018.- Deth dia 3 ath 6 de juriòl er Institut d’Estudis Aranesi- Academia aranesa dera lengua occitana en collaboracion damb eth Conselh Generau d’Aran e era Generalitat de Catalonha organize per prumèr còp un cors especific sus era correccion lingüistica en aranés.

Eth cors que serà impartit per membres der IEA-AALO, aurà lòc ena sedença der Institut, Avenguda Garona, 17 de Vielha, en orari de tardes, a compdar des 18: 00 ores.

Es critèris de correccion, eth procès istoric e er estat de referéncia lingüistica en occitan e en aranés, eth còrpus textuau des darrèri 40 ans, es referéncies, gramaticaus, lexicaus, istoriques e documentaus des darrèri ans, era utilizacion des naues tecnologies, programes de còdi dubèrt e es estruments digitaus, seràn quauqui uns des contenguts que s’abordaràn en aguest cors de 4 dies, que tanben aurà sessions d’exercicis practics.

Eth diuendres 6 de juriòl, se celebrarà ua taula redona jos eth títol de: “Era correccion lingüistica en catalan, en occitan estandard e en aranés”, ena qu’intervieràn, Albert Turull, membre numerari dera Seccion de Filologia der IEC (Institut d’Estudis Catalans); Jacme Taupiac, membre der IEA-AALO, e dera comission qu’elaborèc es Nòrmes ortografiques der aranés; Joan Salas-Lostau, president dera Seccion Estandard der IEA-AALO; e Jusèp Loís Sans, president der IEA-Academia aranesa dera lengua occitana. Era taula redona serà retransmetuda per Aran TV e serà moderada pera jornalista Clara Villar.

Eth prètz deth cors ei de 200€, encara qu’es membres e collaboradors der IEA poderàn assistir gratuïtaments. Ath delà, s’aufrissen 3 bèques entà poder participar. Es places son limitades e ei imprescindibla entath bon profitament deth cors un ordenador portatil entà seguir es explicacions e exercicis.

Tota era información en http://www.institutestudisaranesi.cat/wp-content/uploads/2018/06/CORS-DE-CORRECCION2.pdf