Era Val d’Aran artenh ua aucupacion deth 85% pendent eth Nadau

Era conselhèra de Torisme e Desvolopament Economic, Anna Díaz, a avalorat positivaments es donades d’aucupacion, que s’an plaçat en un 85% entre eth 26 de deseme e eth dimenge 10 de gèr ena Val d’Aran.

• Un totau de 160.000 esquiaires an gaudit dera estacion aranesa Baqueira Beret.

• Entara dimenjada que ven 16 e 17 de gèr se demore ua grana animacion en Baqueira Beret damb era celebracion deth World Snow Day ena estacion e era disputa dera prumèra carrèra de Copa d’Espanha I Trofèu Mastèrs CAEI-AC Otèls.

 

Baqueira-11-enero

Foto: Baqueira Beret

 

Era meteorologia variabla a estat protagonista aguest Nadau a on es esquiaires an gaudit de temperatures agradiues e fòrça solei pendent era setmana de Nadau e d’ua bona nheuada qu’arribèc damb er an nau que deishèc enquia 50 cm enes còtes nautes.

Anna Díaz, conselhèra de Torisme e Desvolopament Economic d’Aran a manifestat “maugrat era climatologia qu’auem agut pendent eth Nadau, era aucupacion ena Val d’Aran a estat fòrça bona e es visitants an pogut gaudir der esquí, des circuits de BTT, des rotes deth romanic d’Aran, atau coma deth comèrç e dera gastronomia aranesa”.

Baqueira Beret, era estacion dera Val d’Aran e Vals d’Àneu a estat daurida toti es dies des vacances damb ua mieja entre 120 e 130 km esquiables e practicaments toti es telesères en foncionament. Açò a permetut qu’es mès de 160.000 esquiaires qu’an visitat era estacion entre eth 26 de deseme e eth 10 de gèr se repartissen de manèra fluïda per airau esquiable dubèrt e es 34 telesères en foncionament. Tanben an estat dauridi pendent es dues setmanes de vacances eth circuit gratuït de 7 km d’esquí de hons de Beret e eth snowpark qu’amasse as freestylers d’esquí e surf de nhèu.

World Snow Day damb magnificència

Era dimenjada deth 16 e 17 de gèr se celèbre en tot eth mon eth Dia Mondiau dera Nhèu. Damb aguest motiu Baqueira Beret a organizat un conjunt d’activitats ath delà de promòir era afluéncia a pistes mejançant ua atractiua promocion destinada a debutants e es sòns acompanhaires.

Era promocion includís es classes d’esquí aupin damb Era Escòla (en grops de 8-10 persones) entàs dus dies en airau de debutants de Beret entre es 11 a 13 ores. Eth prètz tanben compde damb eth loguèr de materiau es dus dies (esquís, bòtes e bastons) e tanben es minjars en pistes. Eth prètz d’aguesta promocion ei de 76€ (includit er usatge des telesères) per persona era dimenjada damb es mencionadi servicis. Tanben se premiarà as esquiaires abituaus que pòrten un amic debutant ara promocion e eth forfait jornalièr les demorarà per 24€ damb accès a tota era estacion.

Eth punt d’amassada serà eth dissabte tàs 10 deth maitin ena Tor de Contraròtle de Beret, a on s’arrecuelheràn es tiquets que permeteràn retirar eth materiau e assistir ath curset. Aguesta accion ath delà d’amiar-se a tèrme era dimenjada deth 16 e 17, serà activa entàs següents 23-24 e 30-31 de gèr.

En çò que tanh as activitats, destaque eth concors World Snow Day enes hilats sociaus. Baqueira prepause compartir enes hilats sociaus ua fòto divertida des dies 16 e 17 de gèr ena estacion, en tot gaudir de bèra activitat deth World Snow Day damb era etiqueta #baqueiraworldsnowday e es guanhadors guanharàn dus forfaits de dus dies.

Eth dissabte 16 s’amiarà a tèrme er Open Baqueira, ua carrèra gratuïta de giganta, en Stadium de Beret damb prèmis entà categories adults e infantils.

Tanben eth dissabte concors de pipòts de nhèu en Beret ath costat dera cafeteria a compdar des 11 ores enquiàs 13 ores, es mainatges auràn era oportunitat de hèr usatge dera sua imaginacion en tot participar en aguesta activitat. Entà participar cau anar dirèctaments entàs 11 ores ara part exteriora dera cafeteria de Beret.

Era tarde deth 16 tanben ei prevista ua baishada de halhes entàs 18.30 ores e eth lòc dera madeisha se comunicarà a trauès de hilats sociaus dera estacion aguesta setmana.

Entà inscripcions eth quinsevolhe activitat World Snow Day eth contacte ei: carmeta@baqueira.es / 973 639 044.

AGENDA

– Celebracion World Snow Day: activitats definides ena notícia o en link http://bit.ly/1octjmr

– I TROFÈU MASTERS CAEI – AC OTÈLS eth 16 e 17/01: se tracte dera prumèra carrèra dera sason deth circuit Copa d’Espanha de Mastèrs deth calendari Reau Federacion Espanhòla Espòrts d’Iuèrn (RFEDI) e organizada peth CAEI destinat a esquiaires de mès de 30 ans. Un Gigant eth dissabte e un Eslalom eth dimenge entà corredors veterani damb licéncia. I aurà village damb animacions ena mèta gentilesa d’AC Otèls. Eth dia 16 tanben s’amiarà a tèrme un gigant Open destinat a mastèrs sense licéncia, damb un prètz de 25€ per participaire, en quau se pòden guanhar dimenjades en AC Otèls by Marriot. Entà apuntar-se: inscripciones@caei.es / 973 642 057.

 

Vielha, 12 de gèr de 2016

 

Conselh Generau d’Aran: Núria Sanjuan

Comments are closed.