Vielha, 12 d’abriu de 2017.- Eth Conselh Generau d’Aran a signat un convèni damb era Academie Julien Sacaze de Luishon, peth que cedís ua còpia digitalizada de documentacion proprietat deth Conselh Generau entara exposicion monografica que, sus era vida e òbra de Maurice Gourdon, organize aguesta academia.

Maurice Gourdon, neishut en Nantes er an 1847, venguec de fòrça joen as Pirenèus concrètaments a Luishon e mès tard ara Val d’Aran. Gourdon, qu’ère geòleg, ère tanben un gran diboishant, pintor e litògraf que deishèc centenats de documents, fòrça que se ne tròben en Musèu deth País de Luishon e d’auti, sustot diboishi originaus de la Val d’Aran, sigueren aqueridi en sòn moment peth Conselh Generau d’Aran e se tròben en Musèu dera Val d’Aran e en Archiu Generau d’Aran.

Maurice Gourdon que tanben siguec un des prumèrs fotògrafs des Pirenèus, ei donques un referent culturau tan en Commenges coma ena Val d’Aran e en tot eth Pirenèu.

Organizada peth Comitè Scientific dera Academie Julien Sacaze, damb era collaboracion deth Conselh Generau d’Aran, se monte aguesta exposicion tematica sus era vida e òbra de Maurice Gourdon que se poderà visitar en Luishon, en Musèu de Lourdes e en Nantes. Mès tà deuant, un còp tradusida ar aranés, se poderà veir tanben ena Val d’Aran, concrètaments ena glèisa de Sant Joan d’Arties, atau coma posterioraments ena sedença der Institut d’Estudis ilerdencs de Lhèida.