Eth Govèrn d’Aran, a trauèrs deth Servici Aranés de Benéster e Salut (SABS), signèren est an passat un convèni de cooperacion damb eth Centre Hospitalier Comminges Pyrénées de Saint-Gaudens e eth Centre Hospitalier Universitaire (CHU) de Toulouse entà pr’amor de contunhar e mielhorar eth tractament des urgéncies dera Val d’Aran qu’agen de besonh er accès ath CHU de Toulouse e/o ath CH Comminges Pyrénées.

A rason d’aguest convèni, eth sindic d’Aran, Carlos Barrera, e eth conselhèr de Territòri d’Aran, Jose A. Boya, era directora Servici Aranés de Benéster e Salut (SABS), Maria Àngels Borràs, er assessor d’Emergéncies dera Val d’Aran, Joan Canalias, e eth reponsable de TESVA, Fran Cardeñes, s’an reünit damb er assessor ena direccion deth SABS en relacions internacionals, Dr. Jean Louis Heib, eth cap deth Servici SAMU 31 (Service d’Aide Médicale Urgente), Professeur Vincent Bounes, e damb er adjunt ath cap deth Servici deth SAMU 31, Dr. Philippe Frontin.

Ena amassada s’an tractat aspèctes deth convèni coma:

• Es traslats inter-ospitalaris d’urgéncia entre era Val d’Aran e es estructures de tractaments dera Haute-Garonne realizats a cargue deth SAMU 31, includit es motius entà recórrer ath Centre Hospitalier Universitaire de Toulouse, en cas de besonh, per subsidiaritat sus es èishi de collaboracion medica desvolopats pera Val d’Aran damb eth Centre Hospitalier de Comminges Pyrénées. Se sollicitarà eth permís deth SABS entàs demanes de traslats deth Centre Hospitalier Comminges Pyrénées enquias estructures de Toulouse

• Es traslats des intervencions primàries sus eth territòri aranés pes servicis deth SAMU 31.

En paraules deth sindic d’Aran, Carlos Barrera: “Damb aguestes amassades volem contunhar mielhorant era sanitat e eth benéster des nòsti ciutadans damb un sistèma lògic e sostenible”.

Vielha, 13 de gèr de 2017

Conselh Generau d’Aran: Núria Sanjuan