Era pròva de BTT per etapes comence aguest dissabte enquiath deluns, en tres dies pleï de patiment e païsatges espectaculars

Vielha, 21 de junh de 2019.- Ja ei tot premanit entà gaudir dera prumèra edicion dera Hard Bike ena Val d’Aran. Aguesta pròva de BTT, que transcorrerà pendent tres dies pes païsatges mès espectaculars d’aguest paradís pirenenc, compde damb apròp de 130 inscriti ena sua prumèra aventura. Tot un succès entad aguesta cita que se vò assolidar en calendari ciclista mès que just acabe de nèisher.

Aguesta pròva de duretat, coma indique eth lèma GO HARD OR GO HOME, recorrerà a compdar d’aguest dissabte 22 enquiath deluns 24 diferenti paratges dera Val d’Aran per municipis coma Salardú, Arties, Vielha, Mont, Es Bòrdes e Bossòst, entre d’auti, e se disputarà enes categories masculines absolut, mastèr 30, veterans e femenina absoluta.

Adrià Puig, organizador dera pròva, explique que “èm fòrça contenti pera confidança qu’an depausat en nosati es participaires. Segur que gaudiràn fòrça damb eth traçat que prepausam, que se caracterize pera sua duresa e pes sòns païsatges polidi. Auem revisat a hons es camins e tot ei en perfèctes condicions de cara ara corsa”.

Es previsions apunten qu’eth temps respectarà era pròva e pendent es tres etapes non se preve ploja. Dilhèu un prumèr dia damb bèra broma, mès tant dimenge coma deluns seràn dies assolelhadi qu’ajudaràn a gaudir encara mès dera prumèra edicion dera Hard Bike.

Cau arrebrembar qu’a compdar dera sua prumèra edicion realize un trabalh sociau en tot dar eth sòn supòrt a entitats damb fins solidaris. Aguest prumèr an, pr’amor qu’eth color corporatiu escuelhut ei eth vermelh, coma eth dera sang, s’a optat per collaborar damb era Fundación Lucha contra el Sida.

Aguesta pròva ei organizada per Pyrenees Attitude e compde damb eth supòrt deth Conselh Generau d’Aran, er Ajuntament de Naut Aran, er Ajuntament de Bossòst, er Ajuntament de Vielha e Mijaran e Torisme Val d’Aran.

Tota era informacion en https://hard-bike.com/