Vielha, 29 de gèr de 2019.- Un totau de 188 escolans de tresau e quatau de primària des escòles dera Val d’Aran: 124 dera Escòla Garona de Vielha, 18 dera Escòla Sant Roc de Bossòst, 14 dera Escòla Estudi Alejandro Casona de Les, e 32 dera Escòla ZER Val d’Aran (Naut Aran) participen en programa “Espòrt Blanc Escolar”, un programa organizat pera Secretaria Generau der Espòrt e eth Departament d’Educacion dera Generalitat, en que i collabòren eth Conselh Generau d’Aran e eth Conselh Esportiu dera Val d’Aran, Baqueira-Beret, era Deputacion de Lhèida e era FCEH (Federacion Catalana d’Espòrts d’Iuèrn).
Eth Programa Espòrt Blanc Escolar, enquadrat en Plan Estrategic d’Espòrts d’Iuèrn de Catalonha, a er objectiu d’impulsar era iniciacion e era coneishença des espòrts d’iuèrn entàs mès petiti enes sues desparières modalitats. Es escolans auràn er esquí coma ua matèria mès a estudiar laguens dera matèria d’Educacion Fisica. Ei obligatòria, donques serà era nòta dera matèria d’Educacion Fisica deth dusau trimèstre.
Es escolans dera Val d’Aran realizaràn un totau de 8 sessions laguens der orari lectiu ena estacion d’esquí de Baqueira Beret, a on apreneràn es nocions basiques des tres modalitats d’esquí mès abituau, esquí nordic, esquí aupin e snowboard. Eth programa includís tres jornades d’esquí de hons, que se realizen en Beret, 3 d’esquí aupin e dus de snowboard ena zòna de Baqueira.
Eth secretari tecnic deth Conselh Esportiu dera Val d’Aran, Marc Puig, a soslinhat qu’eth programa Espòrt Blanc Escolar ajuda a difóner e promòir era practica des espòrts d’iuèrn e ath madeish temps era cultura e es valors dera nhèu e era montanha.
Ena Val d’Aran ei eth Conselh Esportiu qui s’encargue dera coordinacion e eth Conselh Generau d’Aran se hè cargue deth transpòrt. Pera sua part era estacion d’esquí de Baqueira Beret apòrte es forfaits e eth materiau de besonh entàs activitats.
En conjunt deth Pirenèu catalan, eth programa beneficie 2.481 escolans (1.337 de 3au e 1.144 de 4au de primària) de 60 centres educatius (13 ZER’s, 37 escòles publiques e 10 concertades) der Alt Urgell, Nauta Ribagorça, Berguedà, Cerdanya, Palhars Jussà, Palhars Sobirà, Ripollès, Solsonès e era Val d’Aran.
