Eth passat dissabte 21 de noveme organizat peth Conselh Generau d’Aran damb era collaboracion deth IDAPA (Institut per al Desenvolupament i la Promoció de l’Alt Pirineu i Aran) auec lòc en era Auberja de Salardú era 1èra Jornada de Carn de Caça ena Codina e en Plat.

Carlos Barrera, sindic d’Aran: “Era caça, acceptada sociauments de forma naturau ena Val d’Aran, se pòt convertir en un nau cavòt de creishement economic e ua naua via qu’ajude a incrementar e enriquir era aufèrta gastronomica e toristica dera Val d’Aran “.

Ena presentacion dera jornada, eth síndic d’Aran, Carlos Barrera destaquèc era singularitat dera caça coma activitat sociau pleaments acceptada de forma naturau ena Val d’Aran e sus eth papèr qu’aguesta pòt jogar coma naua via de desvolopament gastronomic e d’aufèrta toristica en Aran.

“Entara gent que ven de dehòra, ei excepcionau poder gaudir d’un bon plat de caça, ben codinat laguens era aufèrta de restauracion qu’aufrissen es establiments deth País”.

Encara qu’eth títol dera jornada podie hèr a pensar qu’eth contengut dera madeisha ère centrat sonque ena prepausa gastronomica, es intervencions de Santiago Lavin, Catedratic e responsable deth Servici d’Ecopatología de Fauna Sauvatja dera UAB, e d’Ivan Afonso, responsable de Miei ambient deth Conselh Generau d’Aran, heren qu’es assistents artenhessen coneishences deth tractament dera carn de caça e eth comportament qu’an de seguir es caçaires en terren e tanben entà obtier informacion dera gestion cinegetica e dera carn silvèstre e de caça qu’amie a tèrme eth CGA.

Santiago Lavin, aufric ua exaustiva charrada dera dignificacion, eth profitament e eth tractament des pèces de caça, era sua manipulacion, era comercializacion e er autoconsum, en tot hèr mencion especiau a que, peth moment, era Generalitat de Catalunya non a aprovat ua legislacion especifica sus aguesta activitat, encara qu’era redaccion dera madeisha ei fòrça auançada.

Lavin: “Cau pèrder era pòur a codinar era carn de caça”.

Lavin, Qu’ei caçaire e gastrònom experimentat, aufric as assistents ua serie de conselhs practics envolòpa eth besonh d’extremar es mesures higièniques e des estruments a utilizar, eth transpòrt, eth tractament des pèces segontes era edat e eth sèxe des captures e eth sòn profitament, atau coma sobre era eleccion dera carn e des desparièrs procèssi d’elaboracion e de contròl dera coccion, entà elaborar òlhes, ara brasa, carpaccios, marinades, patès, confits e terrines, conserves e embotits. Entà Lavin, cau pèrder era pòur a codinar carn de caça.

Pera sua part Ivan Afonso, responsable de Miei ambient deth Conselh Generau d’Aran, dec coneishença as assistents ara jornada des accions qu’amie a tèrme eth CGA ena gestion cinegetica e dera activitat des comissions de caça creada peth madeish Conselh Generau d’Aran hè quate ans, que se decidís tre eth envolòpa es quòtes des caceries, tostemp en tot cercar er equilibri naturau des censi des desparières espècies que conviuen enes montanhes der Aran en defensa des espècies autoctònes entà sajar d’assegurar era recuperacion der Isard, era mantenença deth Cabiròu, frenar era expansion dera Daina e eth contròl dera preséncia deth Cèrvi, entre uns autes accions.

Ena sua intervencion, eth sindic d’Aran, Carlos Barrera destaquèc eth valor e er hèt que tant era caça coma era pesca hèn part dera nòsta convivéncia e en laguens d’aguesta naturalitat acceptada sociauments, en tot remercar era singularitat dera caça, eth sòn valor e aportacion que pòt hèr a nivèu economic coma valor naturau e ecologica, ath delà dera contribucion que pòt representar laguens deth conjunt dera aufèrta gastronomica e toristica dera Val d’Aran.

Entà Barrera, era potencialitat economica de futur dera carn de caça, ei er hèt qu’eth Sector Primari ena Val d’Aran signifique eth 0’4% dera activitat economica, que damb era sua potenciacion e creishement ajudarie a completar eth 83’03% deth totau que represente eth sector de servicis laguens dera economia aranesa. (Hònt: Anuari economic 2013. Caixa Catalunya).

Era Jornada concludic damb ua degustacion des desparièrs plats elaboradi damb carn de caça pes codinèrs deth Grèmi d’Ostalaria dera Val d’Aran e per Santiago Lavin, que heren gaudir damb desparières elaboracions a toti es assistents.