Aguest pròplèu dimenge, dia 27 de junhsèga, se celebrarà ua naua Corsa d’Aran per sa Lengua qu’artenh dejà era 21au edicion.

Era corsa, organizada peth collectiu Lengua Viua, se celebre des der an 1993 entà deféner era lengua aranesa e era identitat damb eth lema de Frederic Mistral … qui ten era lengua, ten era clau.

Un viatge mès es corredors e caminaires tornaràn a gésser des de Montgarri, Tredòs, eth pòrt de Vielha e Les entà arribar, passades es ueit dera vrespada, ena plaça dera glèisa de Vielha.

Es participants arriben en Vielha en tot carrejar es terçons, que permeteràn diboishar eth mapa d’Aran ena plaça dera glèisa, e es drapèus que la guarniràn. Pendent er acte, que compdarà damb era preséncia deth sindic d’Aran, Carlos Barrera, se liegerà eth manifèst deth collectiu Lengua Viua, tostemp reivindicatiu d’un màger usatge sociau dera lengua, e s’autrejarà eth prèmi Lengua Viua, creat tà vantar eth trabalh de persones, collectius o institucions en defensa der aranés.

Tanben s’autrejarà eth prèmi de 400€ ath dessenh dera samarreta escuelhut peth collectiu entre es que se i presentèren e que corresponec a Júlia García. Es diboishi presentadi e es mès votadi se poden vèir en Facebook de Lengua Viua.

Coma ei tradicionau dejà, es samarretes dera Corsa se venen enes cubèrts der Ajuntament de Vielha de 19h00 a 21h00 ores.

Era hèsta dera Corsa acabarà damb eth concèrt deth grop NADAU.

ORARI DERA CORSA ARAN PER SA LENGUA:

Gessuda liura tà passar eth pòrt de Vielha e trobada des qu’ac agen hèt en prat de Tishineret tàs 19,30ores.

– 12h00 Gessuda des de Les (en tot caminar)
– 12h00 Gessuda de Montgarri (en tot caminar)
– 12h50 Parada en Bossòst, plaça dera glèisa
– 14h30 Gessuda des de Tredòs ( en tot caminar)
– 15h00 Es Bòrdes, minjar toti amassa, cadun morralet pròpi.
– 15h00 Unha, minjar toti amassa, cadun morralet pròpi
– 17h00 Gessuda d’Es Bòrdes
– 17h00 Gessuda de Unha
– 17h00 Gessuda des de Montgarri (en tot córrer)
– 18h30 Gessuda d’Arties, plaça Urtau
– 20h15 Arribada ena plaça dera glèisa de Vielha

Parlaments. Autrejament prèmi Lengua Viua

– 20h00 Concèrt deth grop NADAU

Es oraris son orientatius .