Era Val d’Aran tornèc a acuélher ager, dimenge 28 de junhsèga, ua naua edicion dera Corsa “Aran per sa Lengua”. Ua jornada reivindicatiua, esportiua e festiva en defensa der aranés, lengua pròpia deth país.

Eth collectiu Lengua Viua inicièc aguesta carrèra en an 1993 e, enguan, se celebraue era 26au edicion consecutiua d’ua jornada entà deféner e difóner era identitat d’Aran.

Coma ei tradicionau, es participants gesseren, en tot caminar o córrer, des de disparièrs punts dera Val d’Aran (Montgarri, Les, eth Pòrt de Vielha o d’auti pòbles) entà amassar-se ena Plaça dera Glèisa de Vielha.

En arribar se sauvèc ua menuta de silenci pera trista mòrt d’un periodista francés mentre realizaue era corsa.

Ara seguida aueren lòc es parlaments, a on intervenguec era conselhèra de Coneishement, Angelina Cases, hent referéncia ath besonh der emplec der aranés, especiaument des des administracions publiques deth país, en tot acabar eth sòn discors damb eth lèma deth Prèmi Nobel de Literatura, Frederic Mistral: “Qui ten era lengua, ten era clau”.

Enguan, eth Prèmi Lengua Viua a estat entà Xavi Gutiérrez. Un prèmi ben meritat que servís entà reconéisher eth sòn trabalh pera defensa e difusion dera lengua pendent ans.

Fin finau, era jornada acabèc damb eth concèrt de Nadau, que metec era nòta musicau e festiva entà barrar aguesta 26au edicion d’Aran per sa Lengua.