• Aguest pròplèu 31 de junhsèga se celèbre era 28au Corsa d’Aran per sa Lengua, era hèsta dera lengua aranesa.

   

Toti es cornèrs dera Val d’Aran tornaràn a amassar-se un an mès entà celebrar era reivindicacion der usatge der aranès ena 28au Corsa d’Aran per sa Lengua que aurà lòc aguest dimenge 31 de junhsèga. Ua jornada festiua e esportiua damb ua clara finalitat, deféner era lengua e cultura pròpia deth país.

Dempús de dus ans condicionadi pera COVID-19, era corsa, organizada peth collectiu Lengua Viua des der an 1993,  finalizarà eth sòn recorregut ena Plaça d’Aran de Vielha tath torn des 19 ores, un còp qu’es corredors e corredores, atua com es caminaires, hagen vengut des de Montgarri, Tredós, Les e eth Pòrt de Vielha.

Es participaires arribaràn ena Plaça d’Aran dempús de passejar es terçons, engalanadi damb eth drapèu aranés, en representacion de toti es parçans dera Val.  Pedent er acte, se realizaràn es tradicionaus parlaments e entrega deth prèmi Lengua Viu. Athdelà, tanben s’autrejarà eth prèmi ath dessenh dera samarreta escuelhut peth collectiu. Entà acabar, se barrarà era jornada damb era actuacion deth corròp musicau Nadau.

Venta de samarretes:

Dimèrcles 27 en Salardú, dauant dera oficina torisme Salardú, de 17 a 19 ores.

Dijaus 28, diuendres 29 e dissabte 30 en Vielha, enes cubèrtes der Ajuntament de Vielha, de 18 a 21 ores.

ORARI DERA CORSA ARAN PER SA LENGUA 

Gessuda liure entà passar eth pòrt de Vielha e amassada qui ac agen hèt en prat de Tishineret as 18:30 ores.

• • 11:30 ores – Gessuda des de Les (en tot caminar)
  • 11:30 ores – Gessuda des de Montgarri (en tot caminar)
  • 12:15 ores – Parada en Bossòst, plaça dera Glèisa
  • 14:00 ores – Gessuda des de Tredòs (en tot caminar)
  • 14:30 ores – Es Bòrdes, minjar toti amassa, cadun morralet pròpri
  • 14:30 ores – Unha, minjar toti amassa, cadun morralet pròpri
  • 16:30 ores – Gessuda d’Es Bòrdes
  • 16:30 ores – Gessuda d’Unha
  • 16:30 ores – Gessuda des de Montgarri (en tot córrer)
  • 17:45 ores – Gessuda d’Arties, plaça Urtau
  • 19:00 ores – Arribada ena plaça d’Aran de Vielha Parlaments. Liurament deth Prèmi Lengua Viua
  • 19:15 ores – Concèrt deth grup Nadau

Vielha, 26 de junhsèga de 2022