En tot contunhar damb eth programa “Pairinam eth nòste patrimòni” amiat a tèrme peth Centre de Recorsi Pedagogics dera Val d’Aran, 308 escolans dera Val d’Aran visitaràn enquiath mes de març eth Musèu dera Val d’Aran.

Es mainatges coneisheràn er exemplar des “Ordinaciones” expausat en musèu e descorbiràn anecdòtes der armari des sies claus.

308 escolans deth CEIP Garona, der INS d’Aran, dera Escòla Alejandro Casona de Les, dera Escòla Sant Ròc de Bossòst e dera ZER dera Val d’Aran, visitaràn enquiath mes de març eth Musèu dera Val d’Aran.

Aguestes visites contunhen eth programa “Pairinam eth nòste patrimòni” amiat a tèrme peth Centre de Recorsi Pedagogics dera Val d’Aran e a trauèrs dera tecnica de Patrimòni deth Conselh Generau d’Aran, Elisa Ros, es escolans coneisheràn er exemplar des “Ordinaciones” expausat en musèu e descorbiràn anecdòtes der armari des sies claus, caisha fòrta dera epòca a on se sauvaue aguest exemplar e d’auta documentacion deth Conselh Generau d’Aran. Er armari se daurie damb es claus que sauvaven cadun des conselhèrs e s’auien de méter d’acòrd tà poder-lo daurir.

Es “Ordinaciones”, redactaues en 1616 peth juriste aragonés Juan Francisco de Gracia per orde reiau, incorporèren fòrça reformes en sistèma de govèrn tradicionau dera Val d’Aran. A compdar des “Ordenaciones”, era composicion deth Conselh Generau d’Aran quedarie fixada en: sies conselhèrs, sies proòms e un Sindic Generau.

Segons a manifestat era tecniciana de Patrimòni deth Conselh Generau d’Aran Elisa Ros “son visites plan curioses e divertides damb er armari des 6 claus coma protagonista”.

Vielha, 5 de hereuèr de 2016

Conselh Generau d’Aran: Núria Sanjuan