• Enes darrèri dies s’an incorporat ar equip de professionaus sanitaris d’Aran Salut (Conselh Generau d’Aran) un traumatològ e ua ginecològa qu’an de perméter melhorar de forma importanta aguesti servicis que se trapauen en ua dificila situacion pr’amor dera dificultat dera sanitat aranesa entà garantir era cobertura de mètges especialistes

Pendent era dusau setmana deth mes de gèr, er espitau Val d’Aran a artenhut reforçar dues especialitats medicaus primordiaus entath nòste sistèma sanitari, coma son es airaus de traumatologia e ginecologia.

“Dempús d’un intens trabalh de recerca e de diuèrsi contactes per part des responsables der espitau, s’an podut curbir en bona mesura es mancances que patien aguesti dus servicis” manifèste era conselhèra d’Igualtat, Salut e Benèster deth Conselh Generau, Maria Vergés.

Atau madeish Vergés tanben afirme que “era manca de mètges especialistes ei un des problèmes mès importants as que s’enfronte, non sonque era sanitat aranesa, senon eth sistema sanitari en generau, sustot per çò que hè as territòris aluenhadi des granes ciutats, coma ei eth cas dera Val d’Aran” e hig que “ei indispensable que s’establisquen mesures d’incentiu as professionaus e de supòrt as territòris coma eth nòste entà non seguir patint aguestes mancances, que non dèishen d’èster un grèuge comparatiu e condicionen era qualitat assitenciau que receben es usatgèrs”.

Enes darrèri tempsi aguestes dues especialitats s’auien ressentut notablement dera manca de personau, hèt qu’a provocat, per un costat, ua nauta pression asistenciau e, per aute, er aument des listes de demora.