• Era conselhèra d’Igualtat, Salut e Benèster deth Conselh Generau d’Aran a evidenciat qu’en 2012 era Generalitat de Catalunya redusic de forma drastica es recorsi financèrs ath Conselh Generau d’Aran, retalhant en un 20% eth finançament entà Aran e en tot hèr qu’eth pressupòst destinat ara sanitat dera Val d’Aran queiguesse un 10%, en tot qu’eth sistèma sanitari catalan sonque se redusic un 5%.

• Pendent eth Plen extraordinari deth Conselh Generau d’Aran celebrat aguest maitin, s’a aprovat era prumèra modificacion de credit deth pressupòst d’enguan entà poder hèr front ath defecit que patís era sanitat aranesa pr’amor der infrafinançament que i destine era Generalitat de Catalunya

Eth Plen deth Conselh Generau d’Aran a aprovat aué era prumèra modificacion de credit deth sòn pressupòst, qu’includís 900.000 euròs destinadi a curbir eth deficit dera sanitat aranesa.

“Eth sistèma sanitari aranés acumule grèus problèmes financèrs originadi ena retalhada de recorsi qu’era Generalitat apliquèc ath Conselh Generau en tot reducir eth pressupòst dera maxima institucion aranesa en un 20%”, afirme de forma contundent eth sindic d’Aran, Francés Boya, que hig que: “aguest infrafinançament a estat assomit peth pròpi Conselh Generau d’Aran e a comportat un tensionament important deth sistèma financèr dera institucion, ath temps qu’a limitat eth sòn creishement e era implementacion e desvolopament de projèctes e accions de besonh entath territòri e era sua gent”.

En an 2012, era Generalitat de Catalunya redusic de forma drastica era transferencia de recorsi ath Conselh Generau d’Aran entara gestion dera sanitat aranesa. Se passèc de 13.177.000 euròs en 2011 a 10.479.000 en an següent. Eth pressupòst destinat ara sanitat aranesa se vedec redusit en un 10’23%, en tot qu’era retalhada que patic eth sistèma sanitari catalan siguec deth 5%.

Maria Vergés, conselhèra d’Igualtat, Salut e Benèster a declarat que “d’alavetz ençà, era sanitat aranesa patís un important infrafinançament e non s’a tornat a recuperar era chifra iniciau, a despièch qu’era cartera de servicis assistenciaus a aumentat” e a hijut que “eth Conselh Generau d’Aran a auut de destinar un milion e miei d’euros ar an entà curbir aguest deficit”.

Eth sindic d’Aran hèc arribar hè quauqui dies ua missiva ara conselhèra de Salut dera Generalitat, Alba Vergés, en tot expausar aguesta inadmissibla situacion e demanant era creacion, de forma urgenta, d’ua taula de coordinacion e trabalh entre eth departament de Salut e eth Conselh Generau d’Aran entà tractar sus es qüestions qu’agen a veir damb era sanitat aranesa de govèrn a govèrn.

En aguesta carta, Boya tanben destacaue que: “era pandemia deth COVID-19 a metut de manifèst qu’era Val d’Aran, fòrtament castigada per aguesta crisi, a patit mès encara pera manca de recorsi, tant professionaus coma economics e, de cara a possibles rebròts, auem de solucionar aguesta situacion çò de mès lèu possible”. Atau madeish, era conselhèra Maria Vergés, a destacat que “gràcies ara autonomia de que dispausam en matèria de sanitat, Aran a podut afrontar aguesta crisi damb fòrça garanties, pr’amor que mos a permetut cercar es recorsi a on a estat de besonh”.

Pendent eth Plen extraordinari deth Conselh Generau d’Aran celebrat aué, s’a aprovat tanben era mocion presentada peth grup d’Unitat d’Aran en aguesta institucion, a on s’inste ath govèrn dera Generalitat de Catalunya a incrementar de forma urgenta es recorsi economics destinadi ath sistèma sanitari aranés entà resòler eth deficit pressupostari que patís de 2012 ençà.