• Era tradicionau corsa populara enguan non se poderà celebrar pr’amor dera pandemia, totun se cercarà ua possible alternativa entà qu’es corredors federadi poguen realizar era pròva e qu’era sua tempsada non se veigue tant afectada, mès tostemp depenerà dera situacion sanitària deth moment

Eth Conselh Generau d’Aran a decidit ajornar era celebracion dera 42au Marxa Beret, qu’aurie d’auer lòc coma ei tradicionau era prumèra dimenjada deth mes de hereuèr, pr’amor dera actuau situacion sanitària.

“Era Marxa Beret non se pòt celebrar enes madeishes condicions enes que s’a celebrat enquiara, pr’amor que cau limitar ath maxim eth contacte entre persones” afirmaue eth conselhèr d’Espòrts, Héctor Manero, en tot híger que “cercam possibles solucions entà sajar de dar opcions as esportistes federats qu’obtien punts d’aguesta competicion, qu’enguan auie de tornar a èster eth Campionat d’Espanha d’esquí de hons e que forme part deth calendari FIS de Longa Distància”.

Pera sua part, eth tanben conselhèr d’Espòrts, Amador Marqués, asseguraue que: “en cas d’amiar a tèrme era competicion entàs esquiadors e esquiadores federadi, s’aurien de seguir totes es mesures que dejà establic era RFEDI en sòn protocòl COVID-19 entàs competicions que s’amien a tèrme ena tempsada 2020-21 mès, en tot cas, era realizacion o non d’aguesta pròva depenerà tostemp dera situacion sanitària deth moment”.