400 persones participen ena Ultra Trail Val d’Aran

Alfonso Rodríguez e Teresa Forn guanhen era 2au edicion dera Ultra Trail Val d’Aran

Er aranés, Jaime Arribas, acabe en ua meritòria 4au posicion

Era joena aranesa, Marta Céster, guanhèc era Short Trail (17km)

Entrega de prèmis as guanhadors dera Ultra Trail Val d’Aran 2014.

Dempús dera grana capitada dera edicion inaugurau der an passat, eth dissabte, dia 9 d’agost, se celebrèc era 2au edicion dera Ultra Trail Val d’Aran, que recorrec bona part dera geografia aranesa. Entad aguesta edicion s’organizèc un recorregut exigent dividit es 3 distàncies: 17km (Short Trail), 47km (Trail) e 99 km (Ultra Trail).

Er autrejament de prèmis se realizèc en Salardú, e compdèc damb era preséncia deth conselhèr d’Espòrts d’Aran, Marcos Viló, era conselhèra de Torisme, Comèrç e Consum, Anna Díaz, e eth baile de Naut Aran, César Ruiz-Canela.

Es guanhadors dera Ultra Trail Val d’Aran 2014.

Es amants deth running e dera natura poderen gaudir de grani pòrts de montanha, e era ascension, entre d’auti, a ua des montanhes mès mitiques dera Val d’Aran: eth Montarto.

“Ei un aunor entara Val d’Aran compdar damb un eveniment esportiu deth nivèu dera ULTRAIL. Damb era realizacion d’un eveniment d’aguesta magnitud en ostiu podem díder qu’era Val d’Aran compde damb dues cites esportiues importantes annaus: era Marcha Beret e era Ultra Trail” a comentat eth conselhèr d’Espòrts d’Aran, Marcos Viló.

Voluntaris dera Ultra Trail Val d’Aran