• Aguest dijaus, 3 de noveme, entàs 10:00 ores, era sindica d’Aran compareisherà ena Comission d’Ahèrs Institucionaus deth Parlament entà dar compliment a çò que mandate era Lei d’Aran en sòn article 80.2 e debàter sus era situacion d’Aran e eth desvolopament deth sòn autogovèrn

Era sindica d’Aran, Maria Vergés, compareisherà aguest dijaus, 3 de noveme entàs 10:00 ores, ena Comission d’Ahèrs Institucionaus deth Parlament de Catalunya.

“Aguesta compareishença permet dar a conéisher quina ei era situacion actuau deth nòste territòri e es sòns besonhs e a de servir tanben entà qu’eth Parlament de Catalunya daurisque un debat sus era situacion dera Val d’Aran”, assegure era sindica d’Aran.

Er article 80.2 dera Lei 1/2015, deth Regim Especiau d’Aran establís que: “aumens un còp ar an s’a de celebrar un debat sus era situacion d’Aran e eth desvolopament deth sòn autogovèrn ena comission parlamentària que correspone, cossent damb eth Reglament deth Parlament. Aguest debat a de començar damb ua exposicion deth/dera sindic/a”. En aguest sens, tot e qu’era Lei ac permetie d’ençà de 2015, non siguec enquia 2020 quan aguesta compareishença s’amièc a tèrme per prumèr viatge.

Aguest serà donc eth tresau còp qu’era sindicatura d’Aran compareish en Parlament, dempús qu’eth sindic Francés Boya intervenguesse per prumèr còp eth 14 d’octobre de 2020 e era sindica Maria Vergés amièsse a tèrme era dusau compareishença, corresponenta ar an 2021, aguest madeish mes de hereuèr.

Er acte se poirà seguir en directe a trauès deth programa especiau emetut per Lleida TV, atau coma a trauès dera web deth Parlament.