Vielha, 2 de hereuèr de 2018.- Abans d’ager se barrèren es inscripcions on-line entà participar ena 39au edicion dera Marxa Beret, era carrèra populara d’esquí de hons mès important der estat espanhòu, que se celèbre eth pròplèu dimenge 4 de hereuèr. Eth nombre de competidors inscriti ja arribe a 700 participaires. Des inscriti, 180 son participaires internacionaus provenenti de païsi coma Norvègia, Suècia, Finlàndia, Soïssa, França e Itàlia.
Baqueira Beret acuelherà coma ei tradicionau era 39au Marxa Beret es dies 3 e 4 de hereuèr.
Eth dissabte 3 de hereuèr, damb era disputa deth Sprint Salomon entàs 12:00 ores en Beret. Eth Sprint Salomon, ei ua pròva d’exibicion que participe un nombre limitat de corredors d’elèit, enguan seràn 36, damb er objectiu de dar a conéisher aguest espòrt.
Eth dimenge, 4 de hereuèr, as 10:00 ores, se disputarà era 39au Marxa Beret, damb un circuit de 10 Km ena zòna de Beret e Orri; de 21Km ena zòna de Beret, Orri e Montgarri e fin finau eth circuit de 42km ena zòna de Beret, Orri, Montgarri e direccion Marimanha. Enguan s’a trabalhat ena melhora e increment dera senhalizacion deth circuit enes tres categories de competicion. Es responsables dera Marxa Beret, an anonciat qu’enguan es distàncies de 21km e 42 km passaràn per Montgarri.
Era 39au Marxa Beret, qu’ei ua des pròves d’esquí nordic mès assolidades que se realizen en territòri nacionau, ei inscrita en circuit de Marches Populares (Populara Cross-Country Race) deth calendari FIS (Federacion Internacionau d’Esquí), puntuable entath circuit de Copa Espanha RFEDI e entath circuit de Copa Catalana.
Eth vicesindic d’Aran e director dera Marxa Beret, Luís Carlos Medina, expliquèc qu’eth bon ritme d’inscripcions on-line hè a pensar que s’arribarà as 1.000 participaires en aguesta 39au Marxa Beret, en tot ahíger que des dera organizacion ja trabalhen entà que sigue ua edicion istorica dera Marxa Beret, era deth pròplèu an en tot arribar ara 40au edicion.
Es aranesi Marta Cester e Rubén Caseny, an formalizat era sua inscripcion ena 39au Marxa Beret, coma tanben ac an hèt Sadurní Betriu, tresau classificat en an 2016 ena prestigiosa Marcialonga d’esquí de hons, Gral Sellés, integrant deth grop de seguiment especiau d’esquí de hons dera RFEDI, Jan Margarit, que compagine eth trailrunning e er esquí de montanha damb er esquí de hons, Laura Orgué, qu’à era melhor actuacion dera istòria espanhòla actuau en uns Jòcs Olimpics d’Iuèrn, en tot demorar-se a sonque 5,7 dusaus deth diplòma enes Jòcs Olimpics de Sochi 2014, e Diego Ruíz, qu’a concorrut enes Jòcs Olimpics de Nagano 1988, Turin 2006 e Vancouver 2010.
Era Marxa Beret ei organizada peth Conselh Generau d’Aran, Baqueira Beret e er ajuntament de Naut Aran. Compde damb era collaboracion de: Associacion Volentaris d’Aran, Foment Torisme Val d’Aran, Deputacion de Lhèida, Pompièrs d’Aran, Aran Salut, Mossos d’Esquadra, INS d’Aran, ath delà dera Reau Federacion Espanhòla d’Espòrts d’Iuèrn (RFEDI), era Federacion Catalana d’Espòrts d’Iuèrn (FCEH) e desparièrs patrocinadors.
Es inscripcions presenciaus se realizaràn en Pòliesportiu de Salardú (Casa d’Acuelhuda) eth dissabte, 3 de hereuèr, a on s’aurà de presentar era documentacion corresponenta e recuélher eth dorsau, documentacion dera carrèra e es presents des organizadors e patrocinadors, de 09:30 ores enquias 20:30ores ena madeisha casa d’acuelhuda se harà era presentacion oficiau dera 39au Marxa Beret eth dissabte as 19:30 ores.
Tota era informacion dera 39au Marxa Beret a www.marxaberet.com
