Vielha, 14 de març de 2018.- Deth 24 ath 31 de març de 2018 arribe ua naua edicion deth hestivau Pyrenades qu’enguan celèbre era 8au edicion. Eth hestivau prepause un inici de setmana santa ath mès pur estil pirineista a compdar d’ua programacion variada d’activitats entà petiti e grani, a on non i manque era natura, era coneishença, eth cinèma de montanha, era musica, era descubèrta, era reflexion, er auviatge e es activitats ar aire liure. Ja hè ueit ans qu’eth PyrenMuseu deth Refugi Rosta de Salardú organize aguest hestivau qu’apròpe eth pirineisme a toti es publics.

Eth pirineisme ei eth moviment de persones qu’en sègle XIX s’endintrèren enes Pirenèus motivades pera practica esportiua e era exploracion scientifica e umanista dera zòna. Damb un programa que combine toti aguesti elements, Pyrenades reinterprète eth sòn legat e lo hè viu aué en dia.

Conferéncies, excursions, talhèrs infantils, cinèma e musica de montanha son es diferentes activitats prepausades peth hestivau Pyrenades.

Enguan, era session inaugurau deth 24 de març anarà a cargue der escrivan Eduardo Martínez de Pisón, Prèmi Nacionau de Miei ambient, damb era ponéncia “Alabanza de los Pirineos”, un recorregut pera literatura e pentura pirineista. Dimenge 25 serà eth torn d’Òscar Cadiach, pirineista, alpinista e himalaista, que presentarà eth sòn libre “Els 14 vuit-mils” e narrarà es sues experiéncies, era darrèra damb eth patrocini de Torisme Val d’Aran, era ascension ara cresta deth BroadPeak de 8.047 mètres, que lo convertic eth passat 27 de junhsèga de 2017 en prumèr catalan que corone es catorze ueit mils sense oxigèn, en tot entrar, as sòns 64 ans, ara selecta lista de 20 alpinistes qu’an completat es 14×8.000 sense oxigèn.

Ara seguida, pendent era 8au Mòstra de Cinèma de Montanha de Pyrenades, se poderà gaudir dera pellicula dirigida peth pròpi Cadiach “Més enllà del Kumbhakarma”, que relate era istòria deth prumèr sherpa qu’artenhec es 14 crestes de 8.000 mètres. Com ei abituau, cada ser s’aufrirà ua seleccion des melhors films exibidi en Hestivau Internacionau de Cinèma de Montanha de Torelló. Ath delà, cada net abantes deth cinèma se poderà descorbir era experiéncia 360º de realitat virtuau damb era Real 3D · VR Experience, emocions que non deisharàn ath public indiferent.

Es parcs nacionaus deth territòri se meteràn era valor damb era charrada que debanarà eth deluns 26 damb eth títol “Parc Nacionau d’Aigüestòrtes e Estanh de Sant Maurici. Era conservacion dera natura e era dinamizacion deth territòri”, a cargue de Mercè Aníz, directora e conservadora deth Parc Nacionau. Restacat damb aguest tèma, eth dissabte 24 se projectarà eth documentau “Ordesa y Monte Perdido: un siglo como Parque Nacional”.

Eth dimars 27, Marta Bretón, fotògrafa professionau, darà pistes de coma cercar era lutz ena escuror, en tot desvelhar es secrèts dera fotografia nocturna e en tot aufrir un talhèr entà meter-les ara practica. Era medecina de montanha tanben aurà eth sòn espaci dera man deth doctor Miquel Rodríguez, especialista ena matèria qu’eth dijaus 29 explicarà, entre d’auti ahèrs, coma ua accion eficaça d’urgéncia pòt èster determinanta en fòrça casi.

A finaus d’ua setmana a on es talhèrs infantils e es caminades e excursions tanben en seràn protagonistes, era cultura aranesa se meterà de relèu damb eth debat “Er aranés, qui ten era lengua ten era sua identitat” deth diuendres 30 e eth concèrt de clausura deth hestivau deth dissabte 31, a on es artistes aranesi Alidé Sans e Paul Courtinal presentaràn eth sòn nau disc “Henerècla”.

Era volontat de Pyrenades ei dinamizar Salardú e eth municipi deth Naut Aran damb ua prepausa de qualitat que compde damb eth patrocini der Ajuntament de Naut Aran, eth supòrt deth Conselh Generau d’Aran e era collaboracion de fòrça entitats.