Vielha, 01 de març de 2016.- Representants deth Conselh Generau d’Aran, s’an amassat damb representants deth Conselh Departamentau Haute Garonne e dera Communauté de Communes deth Cantón de Saint Béat, en ua jornada de trabalh entà abordar dus naui projèctes transfrontalièrs conjunts. Era amassada a agut lòc ena estacion d’esquí de Le Mourtis.

Ena amassada an assistit José Antonio Boya, conselhèr de Territòri; e Pau Perdices, cap deth Gabinet deth Conselh Generau d’Aran, acompanhadi de Joël Gros, president dera Communauté de Communes deth Cantón de Saint Béat; e de Georges Meric, president deth Conselh Departamentau Haute Garonne, coma maximals representants d’aguestes dues institucions franceses.

Era jornada de trabalh a servit entà méter en comun er interès per iniciar dus projèctes transfrontalièrs compartidi.

Se tracte per un costat deth projècte de camin transfrontalièr “parcours cyclable”, que connectarie eth Camin Reiau dera Val d’Aran, damb eth parcours cyclable ja existent ena part francesa, damb er objectiu de hè’c arribar enquiara ciutat de Toulouse. Aguesta accion, servirie tanben entà que eth Conselh Generau d’Aran assolidèsse de manèra establa desparièrs trams deth Camin Reiau que trauèsse tota era Val d’Aran des de Tredòs enquia Pont de Rei.

Eth dusau des projèctes, consistís ena connexion transfrontalièra des linhes deth transpòrt public entre era Val d’Aran e Comminges, ei a díder entre Les e Fos, entà hèr possible qu’es viatgèrs poguen connectar tanben damb Saint Gaudens e Toulouse.

Cau arrebrembar qué en tot tractar-se de dus projèctes transfrontalièrs, eth Conselh Generau d’Aran e eth Conselh Departamentau Haute Garonne, pòden obtier finançament e sollicitar subvencions dera Union Europèa entà materializar-les.

Es representants deth Conselh Generau d’Aran, an convidat as sòns omonimi francesi deth Conselh Departamentau Haute Garonne e dera Communauté de Communes deth Cantón de Saint Béat, a visitar era Val d’Aran pròplèuments entà contunhar en tot trabalhar en ambdús projèctes.

Fin finala arrebrembar qu’es tres institucions compartissen des de hè ans eth projècte transfrontalièr RisqHydro, entà previer e controtlar es creishudes deth cabau der arriu Garona.