Vielha, 4 de mai de 2016.- Ua equipa des Pompièrs d’Aran a concorrut per tresau an consecutiu, en Campionat de Catalonha de Rescats de Trafic que s’a celebrat en Institut de Seguretat Publica de Catalonha, en Mollet deth Vallès.

Era equipa de Pompièrs d’Aran, integrat per Alejandro Orna (comandancia), María Vilches (sanitària), Javier Cavero, Jordi López, Héctor Cardet e Manel Enseñat (equipa tecnica), li a calgut executar eth sòn trabalh a compdar dera següenta simulacion:

Accident de trafic, damb dus veïculs implicadi (manòbre complèxa). I a dues victimes, ua en exterior des veïculs damb un des sòns membres atrapadi per ua arròda e era auta, ath laguens d’un veïcul atrapat.

Eth cap dera equipa a de decidir era melhor manèra d’abordar er accident e era equipa tecnica ath costat dera sanitària realizar era accion en menor temps possible. Eth temps maximal entad exercici ère de 30 menutes.

Eth campionat de Catalonha de Rescats de Trafic, a ua durada de tres dies, des deth dimars 3 de mai enquiath dijaus 6 de mai, dia que se daràn a conéisher es resultats. Era equipa de Pompièrs d’Aran realizèc era sua intervencion ager dimars, aurà de demorar entà deman dijaus entà conéisher es resultats e eth classament.

Es dus melhores equipes classificadi en campionat de Catalonha, passaràn a disputar eth Campionat Nacionau que se realizarà en Alcorcón (Madrid).