Era setmana passada eth Grop de Rescats de Montanha des Pompièrs d’Aran realizèc ues jornades practiques enes Alps damb montanhes de nautades superiores as 4000m e damb varietat de terrens, canals de nhèu, crestes tecniques e aèrees, fòrça glacières, a on es Pompièrs trabalhèren es sues tecniques e abilitats en aguest tipe de scenari, fòrça semblant ath qu’an en iuèrn ena Val d’Aran e en Pirenèu.

Aguestes jornades pretenen melhorar es abilitats en terrens de montanha de nauta dificultat coma per exemple, crestes, arestes, canals, glacières, terrens mixti (pèira e nhèu), tot açò en tot milhorar era tecnica en hèr a servir eth materiau adequat entad aguest terren.

En paraules de Juanmi Riu, responsable deth Grop de Rescats de Montanha des Pompièrs d’Aran “er objectiu d’aguestes jornades ei obtíer mès experiéncia e auer mès recorsi entà botjar-mos damb mès seguretat e superar quinsevolha adversitat que mos gesque en bèth servici”.

Riu a hijut “un aute des objectius d’aguestes jornades ei hèr coesion de grop, un aspècte fòrça important entara nòsta activitat, rescat en montanha, a on pensam qu’ei important eth collectiu, non es individualitats”.

Eth sindic d’Aran, Carlos Barrera, a manifestat “eth Govèrn d’Aran tostemp a priorizat era seguretat des persones que hèn activitat en entorn naturau dera Val d’Aran coma un des elements dera nòsta destinacion toristica d’esquí de nauta montanha e per açò era formacion contunha deth Grop de Rescats de Montanha des Pompièrs d’Aran ei prioritària entà obtíer aguest objectiu de seguretat”.

Vielha, 18 de mai de 2016

Conselh Generau d’Aran: Núria Sanjuan

Hònt: Grop de Rescats de Montanha des Pompièrs d’Aran