Eth Parlament de Catalunya a commemorat aguesta tarde eth 25au anniversari dera reinstauracion deth Conselh Generau d’Aran damb un acte institucionau eth qué an intervengut era presidenta, Carme Forcadell, eth sindic d’Aran, Carlos Barrera, e Maria Pilar Busquets, prumèra sindica deth conselh reinstaurat e deputada ponent dera lei 16/1990, sus eth regim especiau d’Aran. Toti an defenut es ligams entre es nacions catalanes e araneses, basadi tostemp en respècte ara identitat pròpia e ara libertat.

Era presidenta, Carme Forcadell, a destacat era “perseverància dera nacion aranesa a reivindicar era sua identitat e era sua volentat d’autogovèrn“, e a afirmat qu’ “era relacion de Catalunya damb Aran ven definida peth respècte ara identitat pròpia”, pr’amor que “sonque se pòden bastir projèctes compartidi des dera libertat, jamès des dera imposicion”. Atau madeish, a manifestat era sua volentat de refortilhar e estrénher ligams entre eth Conselh Generau e eth Parlament, e tanben eth desir que, “des deth respècte mutuau e era estima pera libertat, era nacion aranesa participe e dongue supòrt as projèctes politics de futur de Catalunya”.

Eth sindic d’Aran, Carlos Barrera, a destacat era “legitima aspiracion” dera Val d’Aran d'”auançar cap a un major autogovèrn”, e a soslinhat era importància des leis qu’establissen aguest autogovèrn, tant era deth 1990 coma era deth regim especiau d’Aran, aprovada est an passat.

Ath darrèr, Maria Pilar Busquets, a manifestat que “Catalunya a estat ua nacion fraia e leiau” qu’a comprenut, respectat e estimat” era Val d’Aran. “Desiri qu’es catalans tròben eth camin de libertat que cerquen” e “qu’eth pòble aranés contunhe ath sòn costat, en tot lutar per un futur melhor”, a concludit.

Er acte a acabat damb era interpretacion der imne dera Val d’Aran a cargue dera cantaira aranesa, Alidé Sans.

Ara commemoracion i an assistit, entre d’auti, es conselhèrs deth Plen deth Conselh Generau d’Aran, es vicepresidents dera cramba, Lluís M. Corominas e José M. Espejo-Saavedra, es quate secretaris, Anna Simó, David Pérez, Joan Josep Nuet e Ramona Barrufet, e deputats de toti es grops parlamentaris.

Er acte a commemorat es prumères eleccions ath Conselh Generau d’Aran restablert, que se heren eth 17 de junh de 1991 sus era basa dera lei deth Parlament 16/1990, deth 13 de junhsèga, que recuperaue es institucions araneses un sègle e miei dempús que siguessen abolides per ua reiau orde.

VIDEO DER ACTE:  http://www.parlament.cat/web/canal-parlament/videos/index.html?p_cp1=7717108

Vielha, 15 de junh de 2016

Conselh Generau d’Aran: Núria Sanjuan

Hònt e Fotos: Parlament de Catalunya