Vielha, 6 de junhsèga de 2016.- Eth Servici Aranés de Benèster e Salut (SABS) e eth Conselh Generau d’Aran, deuant quauques informacions apareishudes en referéncia ara atencion medicau des usatgèrs des municipis d’Arres, Bausen, Bossòst, Canejan, Les, Naut Aran, Vilamòs e Es Bordes, pendent es mesi d’ostiu enes consultòris locaus des municipis, informe:

• Qué maugrat es multiples gestions realizades entà dar cobertura as vacances des mètges des mencionadi consultòris, non s’an trobat facultatius disponibles que poguen assumir aguestes suplències en tot garantir era qualitat assistenciau exigida, e qu’en cap cas ei per fauta de pressupòst.

• Deuant aguesta dificultat, e coma a succedit en ans anteriors, s’a començat un plan de contingència entà garantir era assisténcia medicau e minimizar es repercussions e molèsties as usatgèrs pendent es mesi de junhsèga, agost e seteme.

• Informar qu’aguestes mesures sonque afècten ath Dispensari Medicau, es dispensaris d’Infermièr/a des consultòris locaus foncionaràn coma ei abituau.

D’aguesta manèra es pacients tostemp disposaràn d’un professionau sanitari en orari establit.

• S’a remetut a toti es bailes des municipis afectadi ua nòta informativa en tot detalhar es oraris d’atencion ar usatgèr des sòns consultòris locaus entà que poguen informar adequadaments as ciutadans.

Eth Servici Aranés de Benèster e Salut (SABS) e eth Conselh Generau d’Aran, velhen permanentaments entà garantir ua atencion sanitària de qualitat a toti es ciutadans d’Aran.