Vielha, 22 de junhsèga de 2016.- Era pròva pilòt entara regulacion der accès motorizat ena Ribèra deth Joèu, comence aué dia 22 de junhsèga enquiath dimenge 11 de seteme e comportarà qu’es darrèri 3 km dera pista dera Artiga de Lin, siguen reguladi. Es veïculs que non dispòsen d’autorizacion d’accès motorizat, auràn d’estacionar ena zòna d’estada plaçat abans dera ermita dera Mair de Diu dera Artiga de Lin.

En aguest espaci s’a installat ua caseta d’informacion entàs visitants, que tanben disposaràn d’un huelheton d’informacion complementària damb era descripcion dera Artiga de Lin, recomanacions, contacte de guides e rotes. Eth Conselh Generau d’Aran, a contractat 3 persones que seràn es encargades d’informar e atier as visitants.

Er orari de regulacion serà de 9 deth maitin a 18 ores. Es taxis deth país auràn liure accès ara Artiga de Lin, atau coma eth rèste de vesins e vesies dera Val d’Aran que paguen er impòst de circulacion des sòns veïculs enes ajuntaments dera Val d’Aran.

En aguesta pròva pilòt, s’abilite un tren que gesserà des dera madeisha zòna d’estada damb servici permanent entàs persones qu’ac volguen utilizar. Eth prètz deth servici serà de 2 èuros per viatge en cas des adults e d’un èuro entà mainatges d’edats comprenudes entre es 3 e es 12 ans. Entàs menors de 3 ans eth trajècte serà gratuït.

Eth sindic d’Aran, Carlos Barrera, a soslinhat que “era Val d’Aran destaque per aufrir un ample ventalh d’activitats dirigides ath torisme familhau. Eth certificat Biosphere Destination, qu’autrege era UNESCO e era Organizacion Mondiau de Torisme, qu’era Val d’Aran a estat era prumèra destinacion de montanha en obtier, arreconeish eth trabalh que se realize en favor d’ua gestion responsable e sostenible deth torisme, e pròves pilòt coma aguesta contribuïssen a preservar espacis unics dera Val d’Aran e a melhorar aguesta aufèrta”.

Barrera ahigec que, es conclusions que s’extrèiguen dera pròva pilòt serviràn entàs decisions a préner en un futur. Se realizaràn enquèstes as visitants dera Artiga de Lin que permeteràn analisar en prigondor era experiéncia implantada e garantir era preservacion des valors naturaus que hèn d’Aran ua destinacion toristica de qualitat.