Vielha, 6 d’octobre de 2016.- Eth sindic d’Aran, Carlos Barrera, a mantengut aué ua amassada de trabalh damb eth conselhèr de Salut dera Generalitat de Catalonha Antoni Comín, entà tractar diuèrsi ahèrs restacadi damb era sanitat aranesa.

Eth sindic d’Aran a expressat ath conselhèr era volontat d’elaborar un plan de salut dera Val d’Aran entà incrementar substanciauments eth pressupòst dera sanitat aranesa, atau coma era prepausa d’un plan biannau d’inversions entath manteniment des servicis der espitau de Vielha.

Era reünion tanben a servit entà tractar era ampliacion deth finançament des òbres der airau quirurgic der espitau dera Val d’Aran, er increment ordinari deth finançament restacat damb er increment impositiu d’IRPF deth personau sanitari e er IVA que s’aplique ath materiau sanitari.

Eth sindic d’Aran, Carlos Barrera, a estat acompanhat ena amassada peth vice-sindic d’Aran, Luís Carlos Medina e pera conselhèra de Torisme, Desvolopament Economic e Salut e Benéster deth Conselh Generau d’Aran, Anna Díaz.