Ja s’apròpe er iuèrn e damb er heired comencen a alugar-se es prumères humenèges enes cases dera Val d’Aran. Un bon manteniment des humenèges supause ua major eficiéncia energetica, ath delà d’esvitar problèmes coma era acumulacion de hums, mala combustion dera lenha e causar huecs que pòt provar era acumulacion de soja e era creosota aderidi enes parets des tubèus d’extraccion de hums.

Ara fin d’esvitar e previer eth risc d’incendis e/o intoxicacions, des deth Conselh Generau d’Aran, vos facilitam es recomanacions següentes:

RECOMANACIONS DE LIMPIESA E USATGE DE HUMENÈGES

– Utilizar entara crèma lenha bèn seca e non resinosa, s’obtie tres o quate mèsi abantes d’èster cremada.

– Non alugar eth huèc damb combustibles ne alcoòls de cap tipe.

– Non cremar en huec d’auti materiaus coma gomes, plastics, cartons, eca., pr’amor que pòden acumular enes tubèus elements quimics inflamables.

– Procurar ua aportacion d’aire e ventilacion corrècta en lòc a on se trape era humenèja.

– Mantier ua nautada de ahlama rasonable e non collapsar er espaci dera humenèja damb massa lenha.

– Dispausar d’un extintor de povàs o ABC e conèisher er usatge a prop dera humenèja.

– Limpiar era humenèja aumenhs un viatge ar an e cada sies mèsi s’eth sòn usatge ei freqüent.

– Comprovar abantes d’alugar era humenèja que tot eth circuit d’evacuacion de hums, atau coma era madeisha humenèja se trape en bon estat e que non i a cap trincament enes tubèus.

En cas de que non dispausar des mieis e materiaus adequats entara limpiesa dera humenèja, consultatz damb empreses especializades.

“Eth bon manteniment des humenèges garantís eth sòn bon foncionament e que duren fòrça ans. Se seguim uns petiti conselhs podem assegurar-mos que siguen en perfècte estat e minimizar eth risc que s’aluguen coma conseqüéncia dera acumulacion de soja” a soslinhat Luís Carlos Medina, vicesindic d’Aran.

Vielha, 4 de noveme de 2016

Conselh Generau d’Aran: Núria Sanjuan