Eth sindic d’Aran, Carlos Barrera, amassa damb era conselhèra de Torisme e Desvolopament Economic d’Aran, Anna Díaz, e eth responsable de Meteoaran, Àlex Sirat, an presentat ena sedença deth Conselh Generau d’Aran eth Servici Meteorologic d’Aran.

Er acte a compdat damb era preséncia deth director Comerciau de Baqueira Beret, Xavi Ubeira, deth president deth Grèmi d’Ostalaria dera Val d’Aran, Ambrós Barberà e des membres dera estructura d’emergéncies e previsions de risqui naturaus d’Aran.

Pendent era presentacion, eth sindic d’Aran, Carlos Barrera, a manifestat: “En aguesti darrèri ans es errades damb era prediccion meteorologica, sustot es dimenjades, an representat pèrtes economiques plan importantes entà Aran. Era Val d’Aran ei ua destinacion toristica de qualitat e a trauès de Baqueira Beret aufrim es servicis dera melhor estacion d’esquí estatau e ua des melhors d’Euròpa. Era importància economica dera sason d’iuèrn ei fondamentau entath sector toristic d’Aran e da estabilitat a ua part importanta dera sua poblacion. Aguest hèt ei eth qu’a motivat qu’eth Conselh Generau d’Aran cree eth Servici Meteorologic Meteoaran entà sajar de garantir un major grad d’encèrt e de qualitat ena prediccion climatologica que pren totau importància en iuèrn e que tanben serà presenta ena rèsta des mesi der an. Aguest servici de prediccion meteorologica complementarà ath dejà existent de prevision de risqui naturaus e de lauegi qu’en aguesti darrèri ans s’a convertit en un referent”.

Barrera tanben a parlat sus es gestions hètes dauant era direccion de TV3 entà pr’amor qu’en programa deth 3/24 notícies en aranés s’informe sus era prevision meteorologica facilitada per Meteoran e tanben dera demana qu’era prevision meteorologica generau de TV3, quan se parle d’Aran, s’utilize era sua denominacion de país: Aran o Val d’Aran, en substitucion de d’autes definicions d’emplaçament coma versant nòrd deth Pirenèu o d’autes utilizades soent.

Eth fonament dera creacion de Meteoaran se base en article 61.6 dera naua Lei 1/2015, deth 5 de hereuèr, deth regim especiau d’Aran, eth Conselh Generau d’Aran exercís es competéncies entara proteccion e era gestion deth miei ambient e es facultats entara execucion des leis en vigor en aguesta matèria. Era Generalitat a de garantir era participacion e era collaboracion deth Conselh Generau d’Aran en subministrament d’informacion meteorologica e climatica, includidi eth contraròtle e eth seguiment des situacions meteorologiques de risc, cossent damb çò qu’establís er article 144.5 der Estatut d’Autonomia de Catalonha.

En un futur se complementarà aguesta informacion damb due camèras webcams plaçades ena boca sud e nòrd deth tunèl de Vielha que poderàn èster consultades a temps reau sus era climatologia dera boca sud deth tunèl de Vielha e er interior d’Aran damb era camèra dera boca nòrd.

Pera sua part, Àlex Sirat, responsable de Meteoaran a soslinhat: “Eth servici de meteorologia d’Aran aufrirà previsions de 3 dies e enes sasons des hèstes de Nadau e pònts hestèrs ampliat a 5 dies. Tota aguesta informacion se poderà consultar a trauès dera pagina web deth Conselh Generau d’Aran, de Torisme Val d’Aran e dera pròpia de Meteoaran. Toti es qu’ac desiren poderàn imprimir eth grafic entà facilitar-lo coma informacion enes pannèus des otèls, comèrci, restaurants e d’auti establiments dera Val d’Aran.”

Era conselhèra de Torisme e Desvolopament Economic d’Aran, Anna Díaz, a barrat aguesta presentacion persutant sus era importància qu’a tà un país toristic de qualitat eth poder facilitar era informacion mès fidabla en encastre dera prevision meteorologica. Tanben a manifestat eth sòn convenciment que Meteoaran anarà guanhant credibilitat e prestigi damb eth dia a dia e s’acabarà consolidant coma eth referent entà consultar es previsions climatologiques deth nòste país.

Vielha, 9 de noveme de 2016

Conselh Generau d’Aran: Núria Sanjuan