• Era Val d’Aran e era estacion d’esquí de Baqueira Beret an plaçat un igló ena plaça Margaret Thatcher de Madrid entà hèr conéisher es nauetats dera tempsada d’iuèrn 2016-17.

Era Val d’Aran contunhe era campanha de promocion entara tempsada d’iuèrn 2016-17 en Madrid damb era collaboracion dera estacion d’esquí aranesa, Baqueira Beret, entà hèr conéisher totes es prepauses de nhèu. Ager dijaus, 17 de noveme, Madrid acuelhec era presentacion dera naua sason d’iuèrn dera Val d’Aran ena carpa/igló plaçada enquia deman dissabte, 19 de noveme, ena plaça Margaret Thatcher de Madrid.

Era presentacion anèc a cargue deth vicesindic d’Aran, Luis Carlos Medina, dera conselhèra de Torisme e Desvolopament Economic d’Aran, Anna Díaz, deth director gerent de Baqueira Beret, Francis Coll, e deth director comerciau de Baqueira Beret, Xavi Ubeira.

“Baqueira Beret ei eth principau reclam de nhèu ena Val d’Aran e per açò era campanha ei conjunta, mès era Val d’Aran ei fòrça mès que nhèu, e aguesta campanha ei era melhor manèra de hè’c a conéisher” comentèc pendent era presentacion era conselhèra de Torisme e Desvolopament Economic d’Aran, Anna Diaz.

Díaz higec: “Volem arregraïr ar Ajuntament de Madrid era sua collaboracion per deishar-mos plaçar er igló en un punt tan concorrut com ei era plaça Margaret Thatcher”.

Pera sua part, Xavi Ubeira, director Comerciau de Baqueira Beret manifestèc: “Baqueira Beret encare era tempsada 16-17 damb melhores enes diferenti airaus entà enriquir e facilitar era experiéncia des esquiaires e snowboarders, tant en pistes coma dehòra d’eres. Eth remodelament de pistes amiades a tèrme eth passat ostiu some 1 km mès ath mapa de pistes abalisades entà un totau de 151 km mès es 5 km d’itineraris de montanha. Ath delà, s’a hijut ath còmput totau eth traçat d’Audi Ski Kronos que tant exit auec eth passat iuèrn. Damb aguesta ampliacion, Baqueira Beret passe a auer 104 pistes abalisades sense desbrembar eth vast domeni de freeride en un airau esquiable de 2.166ha. çò que represente ua aufèrta fòrça atractiua entà gaudir dera nauta montanha”.

Es 156 km de pistes qu’era estacion aranesa Baqueira Beret prepause aguest iuèrn daràn fòrça que parlar atau coma era sua ampla aufèrta d’après-ski.

Vielha, 18 de noveme de 2016

Conselh Generau d’Aran: Núria Sanjuan

Foto: Baqueira Beret