• Pendent era reünion, eth Sindic d’Aran a manifestat ath President era problematica dera carretèra N-230.

Eth sindic d’Aran, Carlos Barrera, s’a amassat damb eth president dera Deputacion de Lleida, Joan Reñé, entà recuélher es trabalhs de possibles collaboracions dera Deputacion en Aran.

Pendent era reünion, eth sindic d’Aran, Carlos Barrera, a manifestat ath President era problematica dera carretèra N-230: “Des deth Conselh Generau d’Aran contunham pensant qu’era estrategia entà portar era maximala pression sus eth titular dera via qu’ei eth Ministèri de Foment, passe per priorizar era seguretat vial en tram qu’acumule eth major numerò d’accidents: d’Aren enquiara boca sud deth Tunèl de Vielha. Es 51 Km d’aguest tram poderien èster melhoradi damb uns còsti perfèctaments assumibles peth Ministèri. En mès d’un 50% d’aguest traçat s’apoderie bastir un tresau carril de veïculs lenti, pr’amor que simplaments se tractarie de movements de tèrres”.

Barrera a hijut: “Era unica forma de poder avalorar aguesta possible solucion passe per realizar un estudi tecnic ath respècte. Aguest prumèr trabalh ac realizaríem des deth Conselh Generau d’Aran e un còp hèt, ac metaríem en comun damb es tecnics dera Deputacion de Lleida entà realizar ua memòria tecnica e poder-la presentar deuant eth Ministèri”.

Pera sua part, eth president dera Deputacion de Lhèida, Joan Reñé, a dat totau supòrt ath sindic d’Aran.

Vielha, 4 de hereuèr de 2017

Conselh Generau d’Aran: Núria Sanjuan

Foto: Deputacion de Lleida