Vielha, 10 d’hereuèr de 2017. Per nauau an consecutiu Torisme Val d’Aran a estat present ena IMTM (International Mediterranean Tourism Market) de Tel Aviv en Israèl, qu’a celebrat enguan era sua 23au edicion.

Era Val d’Aran a estat present en estand de Catalonha dejós dera mèrca Pirenèus, entà hèr promocion dirècta dera aufèrta toristica d’ostiu ena Val d’Aran, que dempús de toti aguesti ans ei ja plenaments consolidada entre es toristes israelians que visiten cada còp mès era Val d’Aran en ostiu.
Segontes era conselhèra de Torisme Anna Díaz, er objectiu de Torisme Val d’Aran “contunhe èster qu’es potenciaus toristes d’aquera zòna mediterranèa coneishen tanben tot çò que les pòt aufrir era Val d’Aran en iuèrn, qu’ei fòrça e fòrça diuèrs”.
Es representants de Torisme Val d’Aran an mantengut contacte e amassades personalitzades damb diuèrsi operadors toristics israelians.