Eth Conselh de Politica Lingüistica der Occitan Aranés s’a amassat ena sedença deth Departament de Cultura dera Generalitat de Catalonha en Barcelona.

Ena reünion, qu’ei periodica, eth secretari generau de Cultura dera Generalitat de Catalonha, Pau Villòria, e era directora generau de Politica Lingüistica dera Generalitat, Ester Franquesa, an dat compde der Informe de Politica Lingüistica der exercici 2015, deth Prèmi Robert Lafont concedit ara Fondacion Musèu Etnològic dera Val d’ Aran, dera Mòstra de Cinema Occitan o des naues linhes de subvencion e de foment der occitan entath 2017, atau coma dera Lei de Pressupòsti entath 2017 e des mesures ena Lei d’acompanhament e dera Resolucion 115/XI deth Parlament entath desplegament dera Lei 35/2010, der occitan, aranés en Aran. Tot aquerò apuant es politiques de foment e de normalizacion lingüistica.

Eth vicesindic d’Aran e vicepresident deth Conselh de Politica Lingüistica, Luis Carlos Medina, e era tecnica de Politica Lingüistica deth Conselh Generau d’Aran, Veronica Barés, an explicat es actuacions hètes en airau deth foment e de normalizacion lingüistica, atau com es darrères publicacions hètes des deth Conselh Generau d’ Aran.

Eth president der Institut d’ Estudis Aranesi – Acadèmia aranesa dera lengua occitana, Jusèp Loís Sans, e eth president dera Seccion Aranesa dera madeisha institucion, Jèp de Montoya, an explicat es activitats realizades pera Acadèmia e s’an presentat es darrères publicacions dera madeisha, en tot soslinhar e desvolopant era importància d’auer publicat eth Vocabulari aranés de Jusèp Condò e es Elements de morfosintaxi der aranés de Joan Coromines, vertaderes òbres que mos aporten era genuïnitat dera nòsta lengua arremassada atau coma se parlaue hè cent ans.

Vielha, 21 de hereuèr de 2017

Conselh Generau d’Aran: Núria Sanjuan