Vielha, 25 d’hereuèr de 2017.- José Antonio Boya, conselhèr de Territòri deth Conselh Generau d’Aran, participèc dijaus ena 11a reünion dera Comission de Consulta e Seguiment deth Plan de Gestion deth cabau minim dera val der arriu Garona, convocada per SMEAG (Syndicat mixte d’études et d’aménagement de la Garonne) en Tolosa.

Pendent era reünion se tractèc era eleccion deth plan d’accions a amiar a tèrme ena gestion der arriu Garona entath periòde 2017-2026.

Ad aguesta reünion assistiren es responsables politics e tecnicians qu’intervien ena gestion dera val dera Garona, atau coma es representants des diferentes confederacions idrografiques.

Eth conselhèr de Territòri José Antonio Boya a manifestat era plea disposicion deth Govèrn d’Aran entà participar e collaborar en toti es plans de gestion der arriu Garona. Boya a arrebrembat que ja hè dus ans a peticion deth pròpi Conselh Generau d’Aran, se dèc impuls ara junta d’explotacion dera Garona, era coordinacion damb es autoritats franceses, entà tractar especificaments es aspèctes restacadi damb era conca der arriu ath sòn pas pera Val d’Aran.