Pompièrs e Emergéncies d’Aran en collaboracion damb es Universitats de Lhèida e Barcelona desvolòpen es Mastèrs d’Atencion Pre-espitalària e Espitalària Urgenta-MAPHU ena Val d’Aran
Vielha, 21 d’abriu de 2017.- Organizadi peth Conselh Generau d’Aran, en collaboracion damb era Universitat de Barcelona, Universitat de Lhèida, Pompièrs e Emergéncies d’Aran e er Institut de Formació Continua de Catalunya, se desvoloparàn entre eth 19 e eth 28 d’abriu es activitats des Mastèrs d’Atencion Pre-espitalària e Espitalària Urgenta, corresponentes ath modul d’AMV (Atencion damb Multiples Victimes) e Atencion de Montanha ena Val d’Aran.
Es activitats des Mastèrs compden damb era collaboracion deth Servici Aranés de Benéster e Salut (SABS) e dera enterpresa TAF Elicoptèrs-Group Habbok.
Deth 19 enquiath 22 d’abriu, s’amiaràn a tèrme es activitats deth Mastèr d’Atencion Pre-espitalària e Espitalària Urgenta-MAPHU, dirigit per Javier Colina, professor titular d’Infermeria dera UB, e Fran Cardeñes, director tecnic de TESVA, coordinat per Juanmi Riu, Àlex Orna, Xavier Bernárdez e Fran Tébar.
Er objectiu deth Mastèr ei coordinar eth trabalh deth personau sanitari damb eth personau d’emergéncies, entà méter en situacion es accions d’uns e d’auti. Cau arrebrembar que mès de 60% deth personau d’infermeria deth SEM (Sistèma d’Emergéncies Medicaus dera Generalitat de Catalonha) an passat peth Mastèr d’Atencion Pre-espitalària e Espitalària Urgenta pendent toti aguesti ans.
Per aute costat, entre es dies 25 e 28 d’abriu, se realizarà eth Mastèr d’Atencion ath Malaut en Urgéncies e/o Emergéncies Pre-espitalàries, organizat peth Conselh Generau d’Aran e Pompièrs e Emergéncies d’Aran, en collaboracion damb era Universitat de Lhèida. Aguest Mastèr serà dirigit per Joan Blanco Blanco e Fran Cardeñes, damb era coordinacion d’Elena Castro, David Moreno e Àlex Orna.
Eth Mastèr anarà sus era atencion sanitària deuant d’un malaut adult damb simptomatologia traumatica e era atencion integrau enes incidents/accidents multiples damb victimes.
Pendent eth Mastèr, s’amiaràn a tèrme diferenti nivèus de formacion ena metodologia sus triatge basic e pediatric, triatge auançat especific en intoxicats per hum e cremadi, atau coma suenhs palliatius en cas d’accidents damb multiples victimes.
Es Pompièrs d’Aran haràn tanben ua demostracion deth montatge e foncionament en temps reau dera Unitat Medicau Auançada d’assisténcia en accidents damb multiples victimes (PMA).
