Vielha, 28 d’abriu de 2017.- Ager dijaus auec lòc era reünion preparatòria dera Comission Bilaterau entre eth Conselh Generau d’Aran e eth Govèrn dera Generalitat de Catalonha, que s’a de convocar enes pròplèus mesi.

Reunió Comissió Bilateral Generalitat-Aran

Ena reünion participèren, eth Secretari d’Administracions Locaus, Joaquim Ferrer e eth sindic d’Aran, Carlos Barrera, acompanhat deth vicesindic d’Aran, Luís Carlos Medina e deth secretari dera representacion aranesa ena Comission Bilaterau, Enrique Pérez.

Ena amassada, se tractèren diuèrsi ahèrs, entre eri, era demanda per part deth Govèrn d’Aran dera ampliacion des servicis der Espitau dera Val d’Aran, atau coma der increment de places de Residéncia geriatrica e de Centre de dia, en àmbit sociosanitari.

Era reünion tanben servic entà tractar aspèctes coma eth traspàs de competéncies entara gestion dera fauna sauvatja ena Val d’Aran, que corresponerie ath Departament d’Agricultura, Ramaderia e Medi Naturau deth Conselh Generau d’Aran, e dera gestion de zònes naturaus e zòna periferica deth Parc Nacionau d’Aigüestòrtes e Estany de Sant Maurici.

Un aute des tèmes dera reünion siguec començar a estudiar es possibles formules, en tot partir des informes tecnics e juridics corresponents, entà iniciar eth projècte de Federacions Esportiues Araneses coma contemple era Lei 1/2015 deth regim especiau d’Aran.

Fin finau, pendent era session de trabalh tanben s’auancèc sus era negociacion relativa ar acòrd de Finançament deth Conselh Generau d’Aran entad an 2017 e era revision deth modèl de finançament e des diuèrsi convènis establidi entre era Generalitat de Catalonha e eth madeish Conselh Generau d’Aran.