• Es òbres qu’aué se presenten corresponen ar apariament e proteccion deth marge esquèr der arriu Garona e ara reposicion deth Camin Reiau enes tèrmes municipaus de Vilamòs e Es Bòrdes

• Aguest projècte a supausat ua inversion de 318.500 èuros, que se some as 400.000 èuros aportadi en 2014 e destinadi a diferenti trabalhs de recuperacion e apariament der entorn afectat pes aiguats

• Era directora generau dera Companhia en Catalonha, Isabel Buesa, e eth sindic d’Aran, Carlos Barrera, an presidit er acte celebrat aguest maitin

Aguest maitin s’a celebrat ena Val d’Aran er acte d’inauguracion dera reabilitacion d’un des trams deth Camin Reiau mès afectat pes aiguats deth 2013. Er acte, presidit pera directora generau d’Endesa en Catalonha, Isabel Buesa, peth sindic d’Aran, Carlos Barrera, e peth director generau d’Enel Green Power Espanha (filiau de renovabla d’Endesa), Enrique de las Morenas, e a compdat damb era preséncia d’autes autoritats e representants, an dat per finalizades es trabalhs d’apariament e proteccion deth marge esquèr der arriu Garona e era reposicion deth tram deth Camin Reiau ath sòn pas pes tèrmes municipaus de Vilamòs e Es Bòrdes. Aguest projècte, qu’a supausat ua inversion de 318.500 èuros, se some as 400.000 èuros aportadi pera Companhia en 2014 e destinadi a diferenti trabalhs de recuperacion e apariament des maus ocasionadi per aiguat.

Er objectiu deth projècte qu’aué s’inaugure ei tornar eth Camin Reiau ath sòn traçat originau, afectat pes fòrtes ploges deth mes de junh de 2013 e que comportèren eth desbordament des arrius qu’entre d’autes causes, erosionèren e s’emportèren bèri trams d’aguest camin que passe per tota era val, majoritàriaments eth parallel ath cors der arriu Garona. Eth tram deth Camin Reiau que se tròbe ara nautada d’Era Bordeta (en tèrme municipau de Vilamòs), e qu’aué s’inaugure, demorèc alavetz entièraments erosionat enquiath punt que calec condicionar un camin alternatiu, que passaue entre finques particulares, entà per’mor de poder comunicar diuèrsi bastiments e parcelles. Era òbra qu’aué s’naugure, posteriora ara reconstitucion des marges der arriu, consistís ara totau reconstruccion deth camin, que s’a hèt damb era formacion d’un terraplen, atau coma era execucion d’un mur esculhèra damb talhús, qu’a de protegir eth terraplen que forme eth camin de futurs aiguats.

Era zòna reabilitada ei d’especiau interès mediambientau donques que se tròbe laguens dera zòna Natura 2000, un hilat ecologic europèu d’airaus de conservacion dera biodiversitat. Er arriu Garona ei abitat naturau de diuèrses espècies protegides, entre es que trapam eth cavilat, era lueira comun e era almesquera des Pirenèus.

A compdar der an 2014, arraïtz deth prumèr convèni signat entre era Fondacion Endesa e eth Conselh Generau d’Aran, era Fondacion a collaborat es diferentes accions relatives ara restauracion ambientau deth Camin Reiau e eth sòn entorn. Concrètaments, a participat, a compdar d’aqueth an, ena restauracion d’aguest camin ath sòn pas per Aubèrt, Era Bordeta e Arties e Garòs atau coma er apariament e pavimentacion deth parcatge dera Mòla en Arties, que da accès ara ribèra de Valarties e era restauracion dera pista Margalida en Bossòst. E, fin finau, eth tram qu’aué s’a inaugurat.

Era Fondacion Endesa ena Val d’Aran

Era Fondacion Endesa a un compromís istoric damb era Val d’Aran que se concrète en fòrça accions relatives ar encastre dera recuperacion mediambientau a on a participat, coma ei eth cas des zònes afectades pes temporaus, e tanben en airau dera cultura. En aguest dusau aspècte, entre es principaus accions a on a collaborat era Fondacion destaquen era illuminacion de Santa Maria d’Arties (Naut Aran), dera glèisa romanica de Sant Andreu de Salardú (Naut Aran) e der interior dera glèisa de Sant Miquèu de Vielha (Vielha e Mijaran). Atau madeish, a participat fòrça estretament damb eth Conselh Generau d’Aran enes trabalhs d’illuminacion d’autes 14 glèises en aguest territòri, qu’aportèc mès de 66.000 èuros.

En totau, era Fondacion Endesa a aportat des der an 2000 uns 150.000 èuros en projèctes d’illuminacion en tota en territòri.

Sus era Fundación Endesa

Era Fondacion Endesa, presidida per Borja Prado, demòstre ua clara vocacion de desvolopament sociau a trauès des sòns projèctes educatius, era formacion entath trabalh, eth compromís damb eth medi ambient e iniciatiues culturaus.

Per çò que tanh as projèctes de caractèr educatiu, prebotge iniciatiues que transformen e innoven era educacion en toti es sòns nivèus e promò era excelléncia academica en encastre universitari a trauès d’ajudes, bèques e catedras. Egalaments, prebotge projèctes de formacion entath trabalh, e met era atencion ena promocion deth talent, dirigit a persones en risc d’exclusion sociau, a joeni emprenedors damb escassi recorsi e a professionaus de mès de 50 ans. Atau madeish, implemente iniciatiues de tipe mediambientau restacades damb era educacion era cultura ecologica e projèctes especifics de melhora en entorn naturau e d’usatge industriau.

Fin finau, era Fondacion seguís prebotjant era illuminacion de bens de patrimòni istoric e artistic, atau coma era promocion, recuperacion e conservacion dera cultura.

Mès informacion a: http://www.fundacionendesa.org/

Vielha, 9 de mai de 2017

Conselh Generau d’Aran: Núria Sanjuan