Vielha, 7 de junh de 2017.- Aué dimèrcles ua delegacion de Relais d’Entreprises e de responsables deth Conseil Départemental Haute Garonne a efectuat ua visita en CEI Val d’Aran de Casau.

Eth motiu dera visita a estat entà conéisher de prumèra man eth foncionament deth Centre d’Enterpreses Innovadores dera Val d’Aran, damb er objectiu de daurir en un futur un centre similar en Luchon.

Eth CEI Val d’Aran, impulsat peth Conselh Generau d’Aran damb era collaboracion de GlobaLleida e era Deputacion de Lhèida, a principauments dues linhes de trabalh. Per un costat, dar era oportunitat deth desvolopament de naues enterpreses, en tot acuélher enes sues installacions enterpreses innovadores o qu’agen relacion damb es naues tecnologies; e d’autra banda aufrir eth supòrt ath sector empresariau dera Val d’Aran mejançant era transferéncia tecnologica e melhora des hilats de cooperacion entre enterpreses deth territòri.

Relais d’Entreprises, que siguec creat en an 2012 per Dominique Valentin, impulse un projècte d’innovacion sociau e de desvolopament sostenible, sustot en àmbit rurau, damb er objectiu de reequilibrar eth territòri, en tot apiejar eth desvolopament des campanhes ruraus e urbanes en tot profitar ath maximal es possibilitats dera transformacion digitau.

Dempús der èxit des sòns prumèrs projèctes s’inicièc eth bastiment d’un hilat nacionau d’espacis afiliadi. Er objectiu ei daurir 300 centres en 2020.