Vielha, 15 de junh de 2017.- Aué dijaus dia 15 de junh s’a celebrat un acte public de reconeishença ara collaboracion der Institut d’Aran damb es accions deth Conselh Generau d’Aran entà hèr préner consciéncia ara poblacion aranesa, e as generacions mès joenes en particular, sus eth foment dera recuelhuda selectiua des residus municipaus coma estrument entà méter era valor er entorn naturau que mos entornege.
En acte i an assistit eth conselhèr de Territòri José Antonio Boya, acompanhat de José Manuel Rodríguez, director der INS d’Aran, e des escolans qu’an collaborat aguest cors coma delegats verdi der Institut d’Aran.
Pendent er acte s’a presentat un vidèo elaborat pes escolans der Institut sus es sues experiéncies en estudi e gestion des residus municipaus generadi ena Val d’Aran.
Per part deth Conselh Generau d’Aran, s’a volut arreconéisher eth prètzhèt des escolans mès destacadi ena activitat, atau coma eth trabalh hèt des dera comunitat educatiua deth centre des dera direccion, professors, personau administratiu e escolanes en generau damb totes es accions innovadores amiades a tèrme entà hèr préner consciéncia as generacions futures dera responsabilitat sociau que toti auem d’assumir ena conservacion deth miei ambient e er usatge racionau des recorsi naturaus.
Pendent eth cors s’an organizat diferenti talhèrs especifics pes diferentes fraccions enes airaus deth centre e s’organizèc un viatge damb es delegats verdi entà visitar es diferentes plantes de tractament de residus a on se gerissen es residus generadi ena Val d’Aran.
En madeish acte s’a presentat un vidèo elaborat pes alumnes der Institut sus era sua experiéncia e trabalh d’investigacion pendent es visites as plantes de Fígols e Lhèida.
Er INS Val d’Aran ei cabecièr en impuls des delegadi verdi, ua figura que non existís encara en d’auti centres educatius.
Eth conselhèr José Antonio Boya a destacat era importància des accions d’aguest tipe entà fomentar era implicacion de toti es sectors dera societat ena conservacion dera natura que mos entornege entà arténher un desvolopament mès sostenible deth nòste territòri.
