Vielha, 15 de junh de 2017.- “Aran-Pirenèus” serà eth nòm comerciau dera naua rota toristica entà recuperar eth Camin de Santiago que junh Saint Bertrand de Comminges e Berbegal en Òsca, qu’a ua part importanta deth sòn recorregut ena Val d’Aran.

Ua quinzea de representants deth Pirenèu e Pre Pirenèu, entre eri eth conselhèr de Territòri deth Conselh Generau d’Aran, José Antonio Boya, mantengueren dimèrcles ena sedença deth Conselh Comarcau dera Nauta Ribagorça era dusau reünion de trabalh entà desvolopar aguest nau producte d’impacte toristic e economic qu’englobarà diuèrsi territòris: França, era Val d’Aran, Nauta Ribagorça e era Ribagorça aragonesa.

Ena reünion s’acordèc qu’era varianta s’amplie des de Saint Bertrand de Commenges enquia Berbegal (Òsca), en lòc de finalizar-la en Roda d’Isábena. Aguest cambi se compren entà poder júnher aguest projècte damb eth tram ja finalizat e comercializat ena zòna de Somontano e que enlace damb diuèrses variantes dera rota, entre eres era catalana.

Pendent era reünion s’acordèc era comission de trabalh qu’aurà de definir era vessant tecnica e comerciau dera rota. En aguest sens, se vò aderir-se ara Federacion Espanhòla d’Associacions d’Amics deth Camin de Santiago que pòt èster un important canau entara promocion d’aguesta naua rota toristica. Aguesta comission l’integraràn dus representants de cada zòna e tanben participaràn tecnics de torisme e de miei ambient.