Vielha, 30 de junh de 2017.- Ager dijaus pera tarde auec lòc ena sedença deth Conselh Generau d’Aran era charrada-collòqui sus era aplicacion des TIC (Tecnologies dera Informacion e Comunicacion), que desvelhèc gran interès entre es empresaris e professionaus deth sector toristic ena Val d’Aran.
Era charrada-collòqui, damb eth títol de “Torisme e naues tecnologíes: Era economía aranesa deth S XXI” siguec a cargue de Jacint Berengueras, project manager e data scientist de OcSTEM Solutions, enterpresa recenta creacion ena Val d’Aran especializada ena gestion des estruments e possibilitats qu’aufrissen era IOT, big data, blockchain entre d’auti naui estruments tecnologiques.
Era tecnologia ei un miei entà arribar as clients, expliquèc Berengueras, qu’ahigec qu’era manèra de véner es productes ei çò qu’a cambiat gràcies ara tecnologia. Netflix o Airbnb an comprenut quin ei eth canau, saben com arribar ath sòn target de client de manèra mès rapida e efectiva. Païsi coma Suècia, o quauqui otèls ja s’aufrissen a trauès d’Airbnb.
Ua des claus ei qu’eth negòci sigue ena gestion dera informacion. Eth sector a d’adaptar-se ara demanda des usatgèrs. Era experiéncia d’usatgèr ei clau entà auer èxit, pr’amor que s’a de ténder a tractar ath client de forma individuau e èster capaci d’anticipar-se enes sues preferéncies.
“Uber ei era major companhia de taxis e non a cap taxi. Facebook ei era major enterpresa de contenguts e non produsís cap contengut. Alibaba ei eth major venedor deth mon e non fabrique un solet producte e Airbnb a eth major nombre d’apartaments deth mon e cap d’eri en proprietat “. E coma hèn negòci alavetz? Eth negòci ei ena gestion dera informacion, afirme Berengueras.
Era charrada metec de manifèst er interès per part des empresaris e professionaus deth sector toristic dera Val d’Aran, entà adaptar-se as possibilitats qu’aufrissen es tecnologies ara ora d’incrementar era fidelizacion des clients e er aument de ventes, atau coma eth besonh dera implicacion des institucions araneses entà que era Val d’Aran pogue dar un saut quantitatiu e qualitatiu coma destinacion toristica de prumèr orde.
