Vielha, 2 d’agost de 2017.- Eth  Conselh Generau d’Aran e er archiprestat d’Aran an començat era execucion  dera IIau Fase deth projècte d’intervencion ena  glèisa dera  Mair de Diu de Montgarri, redactat pès Servicis Tecnics deth Conselh Generau d’Aran e tamb un còst de pròp de 70.000€.  En 2016 s’encetèren es trabalhs que consistiren ena reabilitacion dera cobèrta dera cabecèra dera glèisa.

Enguan era intervencion prevé eliminar es filtracions d’aigua a trauès deth mur perimetrau nòrd e era renovacion deth paviment dera glèisa, que se trobaue plan degradat pera umitat.

S’a procedit  donc ara retirada dera tarima de husta e ei prevista era sua  substitucion per un nau paviment mixte, de lòses de pèira arenisca clara aboishardada, ena zòna de major circulacion (entrada e passadís centrau) e de tarima tradicionau de taules de husta ena rèsta. Aguest paviment se plaçarà a major  nautada qu’er actuau, çò que  permet hèr mès accessibla era glèisa en tot suprimir  eth gradon dera entrada e tanben un des deth presbiteri. Aguesta elevacion a de perméter tanben un mielhor isolament e ventilacion per dejós deth  paviment.

Exteriorament s’a  procedit ara dubertura d’ua rasa ath long dera façada nòrd a on en iuèrn s’acumule ua grana quantitat de nhèu e aigua, a fin de  drenar eth terren e perméter era evacuacion  des aigües.  Es trabalhs s’an amiat jos contròtle arqueologic   pr’amor de tractar-se der espaci qu’aucupaue era glèisa precedenta d’estil romanic e datada en s. XII, dera quau era glèisa actuau d’estil neoclassic, bastida en 1786,  ath costat sud, ne profite era part baisha  deth mur meridionau, en quau se i consèrve era antica portada romanica, tamb 3 arquivòutes  de miei punt.

S’an podut  documentar era part inferiora deth mur meridionau dera glèisa romanica, dividida en quate trams, atau coma eth paviment de labades deth presbiteri, atau coma er arrincament dera absida romanica.

Tanben se procedirà ara restauracion e dignificacion dera portada romanica, qu’ara daurís ena prumèra capèla quèrra dera glèisa actuau. S’a retirat era    escala que parciaument la caperaue e ei prevista era sua illuminacion e senhalizacion.

S’an recuperat e metut en valor  en ua auta des capèles lateraus era antica batiadèra e ua olièra.

Es trabalhs acabaran a finaus d’ostiu.