Eth sindic d’Aran, Carlos Barrera manifèste qu’eth transit massiu de veïculs de gran tonatge ena N-230 ei incompatible damb er accès de torismes enes comarques deth Pirenèu de Lhèida.

Vielha, 10 d’agost de 2017.- Aué dijaus tas 12.30h s’a produsit er accident d’un camion en km. 104 dera N-230 entre Arén de Noguera e era boca sud deth tunèl de Vielha, en qu’eth camion a resultat bolcat, en tot provocar un talh de transit enes dus sentits dera marcha qu’a talhat era carretèra d’accès ara Val d’Aran pendent ores.

Eth sindic d’Aran, Carlos Barrera, a manifestat qu’era reiteracion d’accidents de veïculs de transpòrt pesat ena N-230 hè qu’aguesta via age arribat ath punt deth collapse, donques supòrte eth pas de mès de 500 camions de granes dimensions jornalièraments. Açò la hè incompatible damb eth transit de torismes que s’adrecen a un destin toristic deth Pirenèu per aguesta via de comunicacion.

Hè uns mesi eth sindic d’Aran assistic a ua reünion ena Deputacion de Lhèida, convocada pes Deputacions de Lhèida e Òsca, a on es assistents meteren en evidéncia era preocupacion pera inseguretat vial d’aguesta carretèra en aguest tram e era incompatibilitat dera densitat deth transpòrt pesat pera carretèra damb er accès ara part deth Pirenèu que majoritàriaments a es sòns ingrèssi basadi enes servicis e eth torisme.

A compdar d’aguesta reünion eth Conselh Generau d’Aran prenec era decision d’encargar un estudi de melhora d’aguest tram dera N-230 (Arén-boca sud deth tunèl de Vielha), sustot en tot cercar trams entath bastiment d’un tresau carril destinat ath transpòrt pesat e hèr possible es auançaments de torismes sense méter eth risc era sua seguretat.

Aguest projècte se tròbe ores d’ara en ua fase fòrça auançada de redaccion entà presentar-lo adès de finaus de seteme as Servicis Tecnics dera Deputacion de Lhèida damb era peticion ath president dera Deputacion de convocar ua naua reünion damb es representants de toti es municipis afectadi, entà arténher qu’era prepausa compde damb era aprobacion entà dar-li traslat ath Ministèri de Fomenti.

Aguesta prepausa vò minimizar er impacte ambientau, optimizar es trams a on eth bastiment deth tresau carril represente ua inversion sostenible e generar trams de seguretat d’auançaments entà evitar er actuau estrès e nerviosisme des conductors de torismes que les cau suportar fòrça quilomètres en tot circular ath darrèr d’un o diuèrsi veïculs de gran tonatge sense trobar eth moment de poder-les auançar damb es sufisents gatges de seguretat.

Eth sindic d’Aran, Carlos Barrera, a ahijut que “era frequéncia d’accidents de veïculs pesants mos hè a díder damb tota rotonditat, qu’aguest tram dera N-230 ei absoludaments incompatible damb un accès deth sègle XXI as territòris deth Pirenèu de Lhèida”.