Vielha, 22 d’agost de 2017.- A compdar deth dia 28 d’agost e pendent tot eth mes de seteme eth Conselh Generau d’Aran a previst amiar a tèrme ua intervencion de restauracion des pintures muraus dera zòna deth presbitèri en glèisa de Sant Ròc de Begòs. Aguestes pintures sigueren descobèrtes er an  2009  per tecnics deth Centre de Restauració de béns Mobles de Catalunya que realizèren enes murs dera glèisa diuerses cales de prospeccion. Dessús der arc deth presbitèri se i localizèc  ua representacion de Crist Crucificat tamb sant Joan e era Mair de Diu, a un e aute costat, ath pè dera crotz. Ua cartèla  informe qu’era pintura siguec hèta er an 1618.

Ena vòuta deth presbitèri tanben se localizèren pintures. En costat sud, se i pòden observar despartièrs personatges e decoracions vegetaus que semblen correspóner a diuerses fases pictoriques superpausades. En costat nòrd, tanben i a rèstes de pintures  maugrat qu’en estat actuau, resulten plan dificiles d’interpretar.

Actuaument es pintures que se trapen encara parciaument cobertes per ua capa de pintura deth sègle XX, presenten  un  plan mau estat de conservacion, tamb  nombroses alteracions (taques, fisures, henerecles, pèrtes e  lheuaments.

Era actuacion, a cargue dera empresa especializada TdArt, ath delà  deth descobriment, restauracion  e conservacion  des  pintures prevé tanben afavorir-ne  era lectura e comprension.  Tanben ei previst d’efectuar cales ena rèsta de parets interior dera glèisa a fin de comprovar era exiténcia de mès pintures muraus atau coma analizar er estat de conservacion des tres retaules barròcs deth sègle XVIII que se tròben ena glèisa.

Era actuacion qu’a un còst totau de 31.450,77€  a estat possible gracies ara subvencion qu’entara conservacion e restauracion deth patrimòni aranés  recèp anuaument eth Conselh Generau d’Aran dera Diputació de Lleida e tanben a ua subvencion concedida pera Generalitat de Catalunya  qu’a través deth Centre de Restauració de Béns Mobles de Catalunya susvèlhe tecnicament era actuacion.