Vielha, 4 de seteme de 2017.- Er aupinista Òscar Cadiach qu’aguest ostiu a coronat eth Broad Peak de 8.047 mètros, a estat arrecebut aué ena sedença deth Conselh Generau peth sindic d’Aran, Carlos Barrera.

Cadiach, qu’en aguesta darrèra expedicion a compdat damb eth patrocini de Torisme Val d’Aran, se convertic eth passat 27 de junhsèga as 11 ores deth maitin, en prumèr catalan que corone es catorze ueit mils sense oxigèn, en tot entrar as sòns 64 ans, en distinguit grop de 20 aupinistes qu’an completat es 14×8.000 sense oxigèn.

Eth sindic d’Aran, Carlos Barrera, a explicat pendent era recepcion que comencèren a parlar de dar supòrt ara expedicion de Cadiach des deth Conselh Generau d’Aran, pendent era presentacion dera sason de Baqueira Beret der an passat, e qu’eth Govèrn d’Aran se sentie capinaut d’auer collaborat en aguest rèpte der aupinista, pr’amor que s’i a quauquarrés que compren era filosofia dera montanha, èst ei Òscar Cadiach, didec.

Pera sua part Cadiach, expliquèc qu’en sòn moment, hè ja quauqui ans, demorèc enamorat deth verd des montanhes e dera gent dera Val d’Aran, e per supausat deth blanc dera nhèu en iuèrn. Cadiach, a volut arregraïr fòrça especiuaments era collaboracion dera conselhèra de Torisme d’Aran, Anna Díaz, en aguesta expedicion ath Broad Peak, pr’amor qu’era Val d’Aran, ei “era Esséncia des Pirenèus” e ara tòque eth Pirenèu e ací seram, remerquèc.

Fin finau, eth sindic d’Aran, Carlos Barrera, a convidat a Òscar Cadiach a participar ena inauguracion deth nau refugi dera Artiga de Lin, ena rota aranesa der Aneto, un des darrèri projèctes deth Conselh Generau d’Aran, ena preservacion dera natura e dera filosofia de vida de montanha dera Val d’Aran.