Vielha, 22 de seteme de 2017.- Era conselhèra de Torisme e Desvolopament Economic d’Aran, Anna Díaz, a avalorat positivaments es resultats dera campanha toristica d’estiu ena Val d’Aran. Díaz, a explicat qu’es resultats indiquen que s’a mantengut ua aucupacion peth dessús deth 70% enregistrada en establiments otelèrs dera Val d’Aran pendent es mesi de junhsèga e agost, e qu’aguest mes de seteme es resultats son pro positius e demoren peth dessús dera mieja d’emplec der an anterior.

Anna Díaz, a hèt ua revision generau des resultats en tot auer en compde era cada an mès ampla aufèrta toristica dera Val d’Aran pendent era campanha d’estiu. Era conselhèra, a avalorat er aument de visitants en Ecomuseu de Joanchiquet, damb es visites teatralizades qu’an començat aguest estiu, es religades damb es rotes deth Romanic, er èxit assolit deth Parc de Fauna “Aran Park”, e er increment de visitants tanben enes Musèus dera Val d’Aran. Eth Conselh Generau d’Aran meterà en foncionament pròplèuments un servici de visites audioguides, en diuèrsi idiòmes, entà completar era aufèrta culturau des musèus.

Sus ua des apòstes mès importantes deth Conselh Generau d’Aran entà melhorar era aufèrta toristica en estiu ena Val d’Aran, Anna Díaz, expliquèc qu’es visites ara ribèra dera Artiga de Lin, a on eth Conselh comencèc est an passat un servici de tren entàs visitants d’aguest lòc, mòstren un increment deth 36% de tickets venudi respècte a est an passat, çò qu’assolide era regulacion d’accès motorizat ara ribèra dera Artiga coma ua excellenta opcion entara preservacion der entorn, qu’ath delà enguan s’a vist refortilhada damb eth Camin de Saboredo – Camin dera aigua, que permet hèr era visita ara ribèra dera Artiga de Lin a pè ath costat der arriu, en tot contemplar er entorn de manèra diferenta.

Díaz, a explicat qu’eth nombre d’usatgèrs deth Tren dera Artiga a estat de 26.913 persones, e que s’a dat informacion complementària a 18.000 visitants mès en punt d’informacion toristica de Torisme Val d’Aran ena zòna.

Es burèus de Torisme Val d’Aran an atengut 38.866 persones pendent es mesi de junhsèga e agost de 2017, e es prumèrs dies deth mes de seteme les an visitat 2.689 persones.

Per zònes, en Naut Aran era aucupacion otelèra a estat de 42.91% en junhsèga e de 68,58% en mes d’agost, quan entre 2011 a 2014 se plaçaue entre eth 29 e 33%, e un 55 e 58% respectivaments.

En Miei Aran, un 55% en junhsèga e 73,93% en agost, quan de 2011 a 2014 se plaçaue entre eth 35 e 39% en junhsèga e entre eth 60 e 70% en agost.

En Baish Aran, un 62,29% en junhsèga e 74,82% en agost, quan de 2011 a 2014 se plaçaue entre eth 19 a 42% e eth 42 e 47% respectivaments.

En çò que tanh as visites ara pagina web de Torisme Val d’Aran, deth 1 de junh ath 1 de seteme a arrecebut 18% mès de visites, en tot arribar a 99.881 visites en 2017 respècte as 83.985 der an 2016, damb un aument dera durada e es pagines vistes en un 17 e 8%.

Fin finau era Conselhèra Anna Díaz, a informat que des de Torisme Val d’Aran, ja se trabalhe ena campanha d’iuèrn ena Val d’Aran, que coma tostemp s’amiarà a tèrme damb era collaboracion dera estacion d’esquí de Baqueira Beret.