Vielha, 22 de seteme de 2017.- Eth Conselh Generau d’Aran a trauès deth departament de Cultura e Politica Lingüistica met en foncionament un an mès, eth “Volontariat per aranés”. Un programa que vò facilitar qu’es persones qu’an coneishements basics d’aranés, mès que non s’ausen a parlar-lo, poguen trobar-se damb persones que lo parlen abituauments e d’aguesta manèra practicar era lengua.

Er objectiu principau deth “Volontariat per aranés” ei facilitar un espaci de comunicacion a on era persona qu’a coneishements basics d’aranés e vò lançar-se a parlar-lo e aquerir fluidesa, ac pogue hèr damb ua persona que lo parle abituauments.

Se tracte donques, de méter eth contacte a dus volontaris (eth que lo parle abituauments damb eth que vò aquerir seguretat ara ora de parlar-lo) entà que se tròben a on melhor les semble entà parlar aranés, de manèra absoludaments desinteresada, aumens pendent dètz ores (ua ora ara setmana pendent dètz setmanes).

Sonque cau donques parlar un shinhau d’aranés, disposar d’ua ora ara setmana, pèrder era vergonha e auer desir d’apréner.

Trobaratz tota era informacion sus eth Volontariat per aranés en següent ligam https://www.conselharan.org/volontariat-per-aranes/ o en tot trucar ath telf. deth Conselh Generau d’Aran 973 64 18 01