Vielha, 27 de seteme de 2017.- Eth sindic d’Aran, Carlos Barrera, acompanhat deth conselhèr de Territòri, José Antonio Boya e dera rèsta de tecnicians deth Conselh Generau d’Aran, a realizat ua visita de seguiment des òbres de bastiment deth nau centre de recuelhuda de residus de Beusa en Vielha e Mijaran. Era metuda en foncionament d’aguest nau equipament significarà ua melhora considerabla dera gestion ambientau e facilitarà encara mès era collaboracion ciutadana ena gestion sostenible deth miei ambient.

Era prumèra fase de bastiment d’aguest nau equipament a un pressupòst projectat de 374.446€, adjudicat damb baisha economica de 295.438,65€, qu’era Agència de Residus de Catalunya n’apòrte era quantitat de 250.000€. Un còp acabat era prumèra fase, eth nau centre se poderà méter en foncionament damb 6 des 14 departaments des que disposarà er equipament un còp s’age completat era dusau fase de bastiment.

Aguesta dusau fase, pressupostada en 597.943€ dotarà era installacion des equipaments adaptadi entà facilitar er accès a toti es usatgèrs e melhorar era eficiéncia dera evacuacion e tractament des materiaus geridi en aguest centre.
Era naua installacion ei bastida sus ua parcèla d’uns 4.200 m2 cedida pera ACA (Agència Catalana de l’Aigua) ath Conselh Generau d’Aran entà era adeqüacion dera installacion deth centre de residus que resultèc maumetut pendent es aiguats de 2013.

Eth nau centre s’installe en un recinte barrat qu’aurà ua bascula ena entrada a on s’arreceberà as usatgèrs que pujaràn per ua rampa ath departament des diferentes caishes de residus generadi, degudaments senhalizadi, e, un còp depausat es residus ena caisha corresponenta, er usatgèr contunharà entà baishar per ua dusau rampa abilitada ara fin deth departament e retornarà ara bascula de recepcion a on un operari liurarà eth corresponent albaran d’entrada damb descripcion des caracteristiques des materiaus liuradi en centre, tipe de residu, quantitat, data, ora, pes, eca.

Es diferenti residus geridi en centre de recuelhuda son enviadi as gestors homologadi corresponents, ja sigue damb era madeisha caisha a on se depause eth residu, o es gàbies abilitades tath transpòrt segontes era natura deth producte.

S’estime qu’eth nombre de caishes de 30 m3 que gessen mensuauments deth centre oscille entre 40 e 50. Era dusau fase se demore que sigue en foncionament era pròplèu primauera e era installacion serà premanida entà compactar es materiaus des fraccions qu’atau ac permeten, coma per exemple eth carton e era husta, damb er objectiu d’optimizar eth servici en tot redusir eth numerò de viatges e eth còst qu’açò represente entath Conselh Generau d’Aran e tas ciutadans.

Cau arrebrembar qu’actuauments era Val d’Aran dempús des esfòrci deth Govèrn d’Aran, e damb era collaboracion des grani productors de residus e dera ciutadania aranesa, ei eth 11au territòri de Catalonha a on mès residus se reciclen a trauès dera recuelhuda selectiua. Er increment progressiu e era melhora des percentatges demòstre er aument dera conscienciacion ciutadana sus era importància dera preservacion deth miei ambient.