Vielha, 18 d’octobre de 2017.- Eth sindic d’Aran, Carlos Barrera, a inaugurat aué en Santuari dera nòsta Senhora de Mig Aran, eth 4au Congrès d’Agents Forestaus e Mieiambientaus qu’enquiath diuendres se celèbre ena Val d’Aran. Eth sindic d’Aran a estat acompanhat ena inauguracion per Albert Alins, director generau de Politiques de Montanha dera Generalitat de Catalonha e María Vergés, tinent de baile der Ajuntament de Vielha e Mijaran.

Eth congrès compde damb era participacion de 400 inscriti procedenti de totes es CC.AA. e de França e Andòrra.

Era Val d’Aran acuelh aguest congrès en tot aufrir es sòns servicis d’ostalaria e restauracion enquadrada damb un entorn naturau incomparabla. Es organizadors deth congrès an felicitat publicaments er acuèlh e eth supòrt arrecebut peth Conselh Generau d’Aran, atau coma tanben an arregraït era collaboracion dera Deputacion de Lhèida, Ajuntament de Vielha e Mijaran e der IDAPA.

Eth sindic d’Aran, Carlos Barrera, didec pendent er acte d’inauguracion qu'”un congrès d’aguestes caracteristiques s’ajuste perfèctaments en un territòri coma era Val d’Aran  a on eth sòn 65% ei jos figures de proteccion coma eth hilat Natura 2000 e PEIN, e damb era singularitat de poder exercir es competéncies ena gestion deth Miei Naturau, Bòsqui, Caça e Pesca e Fauna Sauvatja”.

Eth congrès que s’alongarà enquiath diuendres peth maitin, moment en que se liegeràn es conclusions des diuèrses taules de trabalh, tractarà a hons es aspèctes religadi damb era seguretat des agents forestaus e mieiambientaus enes sues intervencions, atau coma era aplicacion des naues tecnologies en àmbit des accions des agents e dera importància que cada viatge mès pren eth supòrt de cans enes especializacions de tralhes de mòstres, podoms e productes quimics.

Eth sindic d’Aran reafirmèc era predisposicion deth Conselh Generau entà qu’era Val d’Aran acuelhe naui eveniments religadi damb era natura e eth miei ambient, quaus coma ja a arrebrembat succedic est an passat quan en Aran se celebrèc eth 1er Congrès Internacionau de Gestion de Fauna Sauvatja enes Pirenèus ath que assistiren representants de França, Andòrra, Catalonha e Aran.

Era adaptacion tecnologica de besonh entara organizacion deth 4au Congrès d’Agents Forestaus e Mieiambientaus en Santuari de Mig Aran, eth Conselh Generau d’Aran a compdat damb era participacion des enterpreses tecnologiques Aran Seguretat e Aran Conectivity, encargades dera gestion der entorn wi-fi entara distribucion de donades e deth cabau de connexion de nauta velocitat. Ambdues enterpreses son installades en CEI Val d’Aran de Casau.