Vielha, 30 d’octobre de 2017.- “Era codina d’un país ei eth sòn paisatge, laguens dera coquèla” diguec er escriptor Josep Pla. Aguesta exposicion preten mostrar era evolucion dera gastronomia ath long dera istòria e coma a cambiat eth paisatge dera nòsta taula. Era globalizacion mos a transformat es aliments, n’a aportat de naui e a cambiat eth mode d’elaboracion, conservacion e produccion. Era museografia dera exposicion se compause de recorsi expositius de tot tipe: interactius, documentaus e objectes etnologics dera vida vidanta enes nòstes codines.

Aguesta  exposicion ei frut deth trebalh conjunt des musèus que formen part der Hilat de Musèus d’Etnologia de Catalonha. Ath delà, “Paisatges ena taula” ei era darrèra exposicion d’enguan ena glèisa de Sant Joan e ua des moltes accions restacades damb era gastronomia en Hilat de Musèus dera Val d’Aran. Aguest 2017, coma an dera gastronomia enes musèus, s’an amiat a tèrme d’autes activitats relacionades damb era tematica. Inaugurèrem er an damb eth Dia Internacionau dera Poesia, un recitau gastro-poetic titolat de “Nhacs Poetics”; seguírem damb es “Nhacs Artistics”, uns talhèrs infantils a on es aliments an estat es protagonistes des creacions des mainatges. Atau madeish, enes visites teatralizades en Joanchiquet era gastronomia prenec part importanta damb ua degustacion finau d’un plat tradicionau aranés, era òlha, en “Joanchiquet tant de gust!”. Mès er an dera gastronomia encara non a acabat e “Paisatges ena taula” arribe acompanhat des naues prepauses entara sasson d’iuèrn, que lèu anonciaram.

Vos convidam a visitar aguesta exposiciona ena glèisa de Sant Joan d’Arties enquiath 27 de gèr de 2018, de deluns a dissabte de 17 a 20 ores.