Vielha, 2 de noveme de 2017.- Aguesta dimenjada, es membres dera Société Ramond de Banhères de Bigòrra, ua quarantea de persones, poderen conéisher de prumèra man es nòstes principaus installacions culturaus. Era Societé Ramond ei ua reconeishuda associacion culturau de fòrça prestigi, neishuda en 1865 damb era mission de velhar per estudi interdisciplinar des Pirenèus. D’entre es nombrosi projèctes amiats a tèrme subergessen eth butletin Explorations pyrénéennes o era creacion der observatòri deth Pic du Midi, ath delà de compdar damb era collaboracion de Maurice Gourdon, celèbre pireneïsta que documentèc era Val d’Aran a finaus deth sègle XIX.

Pendent eth maitin de dissabte, era associacion visitèc eth patrimòni de Vilamòs: er Ecomusèu Çò de Joanchiquet, er antic lauader, era glèisa de Santa Maria, eth herrador de shivaus e eth horn de caudia. Aguest itinerari siguec guidat amassa per Jèp de Montoya (Conselh Generau d’Aran) e Carla del Valle (Musèus dera Val d’Aran).

Eth pòble de Vilamòs aufrís aguesti elements patrimoniaus tipics des pòbles aranesi, que pòden èster visitadi pendent tot er an per toristes e visitants interessadi en apregondir ena cultura tradicionau aranesa.  Er itinerari dera tarde acabèc damb era visita des glèises de Santa Maria d’Arties e Sant Andrèu de Salardú, dera man d’Elisa Ros (Patrimòni Conselh Generau d’Aran); glèises d’origina arquitectonica romanica que conjugue damb formules pictoriques renaishentistes de grana qualitat.

Fin finau, dimenge se visitèren dus des principaus actractius culturaus de Vielha: eth Musèu dera Val d’Aran e era glèisa de Sant Miquèu de Vielha, damb Carla del Valle. Eth Musèu, que demore barrat coma cada an era dusau quinzea d’octobre, daurirà es sues pòrtes a compdar deth pròplèu dimars 31 d’octobre.