Vielha, 6 de noveme de 2017.- Eth Plen deth Conselh Generau d’Aran a aprovat aué ua modificacion de crèdit qu’a de perméter eth bastiment dera residéncia entà gent grana deth Baish Aran.

En aguesta modificacion de crèdit s’a previst eth finançament entara melhora d’accèssi a espacis naturaus dera Val d’Aran e era melhora der accès a Mont e Montcorbau.

En cas deth bastiment dera residéncia geriatrica entara gent grana deth Baish Aran, eth Conselh Generau d’Aran a destinat 2 milions d’èuros deth demorant de tresauariá.

Eth sindic d’Aran, Carlos Barrera, expliquèc qu’es òbres de bastiment dera naua residéncia de gent grana deth Baish Aran se licitaràn sense demora entà garantir qu’era òbra se pogue executar pendent er an 2018 e qu’era residéncia sigue en foncionament en gèr deth 2019.

Tanben se destinarà 1.200.000 € ara melhora der accès a espacis naturaus. Aguesta inversion a un retorn deth 40% qu’aparten as hons europèus FEDER, e eth compromís dera Deputacion de Lhèida de completar-la damb un 25%, çò que significarà ua inversion dirècta per part deth Conselh Generau d’Aran deth 40% dera inversion.

En quan ara melhora des accèssi enes pòbles de Mont e Montcorbau se destinarà ua partida 163.000 €.

Eth plen tanben a aprovat aué poder adjudicar definitiuaments ara Fondacion Pere Tarrés, eth contracte d’arrendament entath foncionament dera aubèrja “Era Garona” de Salardú, un còp eth Conselh Generau a aportat toti es certificadi e a realizat es melhores de besonh en aguest equipament. Aguesta setmana se signarà eth contracte d’arrendament e ei previst qu’eth nau gestor comence a foncionar abans deth dia 24 de noveme.

Fin finau, eth Plen d’aué tanben a aprovat era modificacion dera ordenança reguladora dera taxa de recuelhuda de lordères, damb ua pujada lineau d’un 2,5%, motivada per aument deth còst d’abocament, cau arrebrembar qu’eth residu dera Val d’Aran se gestione ena deishalleria de Fígols de Tremp.

Eth sindic d’Aran, Carlos Barrera, a soslinhat qu’enes pròplèus ans es còsti dera deishalleria contunharàn en tot sofrir un increment e qu’era unica forma de compensar aguest increment de còsti ei damb un esfòrç dera ciutadania entà melhorar e optimizar era recuelhuda selectiva.